Ambasadori Lu tregon emrat e politikanëve kriminelë ose të korruptuar

Ambasadori amerikan Donald Lu zhvilloi sot në internet një bashkëbisedim me qytetarë për problemin e korrupsionit, kultivimit të kanabisit dhe çështje të tjera në Shqipëri.

Duke iu përgjigjur pyetjes për politikanët e korruptuar dhe kriminelë, ambasadori Lu ka përmendur disa emra mes të cilëve edhe ish-deputetin e PS Koço Kokëdhima, të cilit iu hoq mandati për përfitim të fondeve publike.

“Për dekriminalizimin, i kemi dhënë lamtumirën një numri politikanësh kriminelë dhe të korruptuar – mes tyre, më vijnë në mend Xhelili, Frroku, Muhameti, Petraj, Ndoka dhe Kokëdhima. Kemi edhe nja dy që po përballen me akuza penale – Prenga dhe Rroshi – por teksa flasim janë në gjyq. Mendoj që ky është përparim i jashtëzakonshëm, jo vetëm në legjislacion por edhe i kulturës. Populli shqiptar është i lodhur nga këta zyrtarë të korruptuar dhe do që të shohë ndryshim”, është shprehur Donald Lu.