Apeli i LSI-së: Fryma e konsensusit të shoqërojë dhe miratimin e 6 ligjeve

Kryetari i grupit parlamentar të Lëvizjes Socialiste për Integrim(LSI), Petrit Vasili, konfirmoi sot vullnetin e kësaj force politike për miratimin me konsensus të paketës prej 6 ligjesh që do ta bëjnë efektive reformën në drejtësi.

Kryetari Vasili gjate nje bashkebisedimi me gazetarët i informoi ata për takimin e zhvilluar pasditen e së martës mes tij dhe ambasadorëve Donald Lu(SHBA) dhe Romana Vlahutin(BE), ku në fokus ishin pr/ligjet e reformës në drejtësi, që pritet të miratohen së shpejti në Kuvend.

Fryma e konstruktivitetit dhe e mirëkuptimit maksimal qe shoqëroi reformën kushtetuese, apeloi ai, të vazhdojë edhe me miratimin e paketës ligjore, më 29 shtator në Kuvend.

“Është me rëndësi miratimi i paketës së 6 ligjeve, pasi jetëson mesazhin e 22 korrikut, ku u miratuan ndryshimet kushtetuese. LSI e ka konfirmuar edhe njëherë vullnetin e grupit të saj parlamentar për të mbështetur pa hezitim miratimin e plotë të tyre, që janë kyçi për të ardhmen e reformës”, tha Vasili në një komunikim me gazetarët.

Në emër të grupit LSI-së, ai kërkoi që fryma e konstruktivitetit dhe e mirëkuptimit maksimal, që shoqëroi reformën kushtetuese të vazhdojë edhe me ligjet bazë. Në vlerësimin tonë, pjesa më delikate ose zemra e procesit, që ishte reforma në drejtësi ka kaluar me një konsensus të gjerë, ndaj dhe procesi i hartimit dhe miratimit të kësaj pakete ligjore të ecë në rrugën e miratimit të reformës kushtetuese, u shpreh kreu i grupit të LSI-së.

Kjo, sipas tij, eshtë nje reformë madhore që e presin qytetarët dhe per te cilen është bërë investim shumë i rëndësishëm politik. Debatet nuk duhet të jenë të pakapërcyeshme. Me ambasadoret Lu dhe Vlahutin ndamë të njëjtin vullnet dhe dëshirë”, shtoi Vasili.