Ardit Çela: Rilindja i ka shitur interesat e qytetarëve në duart e 3-4 personave
Drejtuesi politik i Lëvizjes Socialiste për Integrim në qarkun e Beratit, Ardit Çela, shprehet se rezultati i kësaj force politike në zgjedhjet e 25 prillit do të jetë “spektakolar” edhe në qytetin e Beratit.
“Janë qindra të rinj që janë afruar rishtaz me LSI, janë me mijëra që po e mbështetin në cdo cep, fshat, e komunë, në Kucovë, Urë Vajgurore, në Poliçan, Skrapar, në Berat, në qytet brenda që do kemi një rezultat spektakolar në zgjedhjet e 25 prillit, e është një rezultat që do e arrijmë bashkë me të rinjtë, të rejat në cdo fshat e komunë. Do i japë përgjigjen shume e shumë individëve të cilët e kanë harruar Beratin e mendojmë vetëm për karriget e tyre”, tha Çela.
Në një intervistë me Bashkim Hoxhën, në News24, Çela tha se socialistët e thjeshtë “që ndihen të papërfaqësuar nga Rilindja”, janë duke u “bashkuar me LSI përditë”.
“Rilindja ka braktisur Beratin e njerëzit, tashmë e PS nuk përfaqësohet më nga Rilindja, tashmë i gjithë pushteti lokal e qendror mendon vetëm për interesat e 3-4 vetëve e nuk mendon më as për socialistët e thjeshtë të cilët janë duke ardhur përditë, por që ne jemi pjesë e një politike të re që merrmi drejtpërdrejt me qytetarin pa bërë show, sic përpiqen të bëjnë disa të tjerë”, tha Çela.
Drejtuesi politik i LSI në qarkun e Beratit akuzoi Bashkinë e qytetit se ka rritur taksat pavarësisht periudhës së vështirë për bizneset për shkak të pandemisë së koronavirusit.
“Për fat të keq qarku i Beratit është lënë në harresë, kjo qeveri dhe Rilindja s’janë kujtuar fare për qarkun e Beratit. Shohim një varfëri të jashtëzakonshme. Berati, Kucova, Ura Vajgurore, Skrapari, Policani, janë zhytur në mjerim.
Është për të ardhur keq që një qark me një rëndësi kaq të madhe për zhvillimin e vendit e me potenciale të jashtëzakonshme e me resurse ekonomike të jetë në këtë gjendje ekonomike që sot është qarku i Beratit e familjet e këtij qarku. Rilindja i ka shitur interesat e qytetarëve të Beratit në duart e 3-4 personave jashtë PS e jashtë Rilindjes.
Punon një popull i tërë e përfitojnë 3-4 persona, është për të ardhur keq kur sheh biznesin e Beratit që lëngon e është zhytur në mjerim, që biznesi në qarkun e Beratit mezi mbyll pagesat në fund të muajit, pagat e kur sheh një Bashki që i ka rritur 50%, 100% apo 200% taksat në kohë pandemie”, u shpreh Ardit Çela.
