Balla sërish thirrje SPAK-ut: Nisni hetimet për Berishën

Kreu i Grupit Parlamentar Socialist, Taulant Balla, ka folur për mediat pas mbledhjes në selinë e Kuvendit.

Balla u ndal sërish te shpallja “non-grata” e kryedemokratit Sali Berisha nga SHBA dhe bëri sërish thirrje që SPAK të nisë hetimet.

“Një kërkesë e kahershme që lidhet me shpalljen e shtetasit Sali Berisha si një person i përfshirë në korrupsion të nivelit të lartë nga SHBA, vendim i bazuar në prova. SPAK-ut i duhet t’i japë një përgjigje kësaj çështje, duke e shoqëruar edhe me kërkesën zyrtare që duhet të dërgojë në SHBA. Është e papranueshme që në një shtet aleat Berisha është shpallur non grata për korrupsion dhe në Shqipëri kjo nuk shoqërohet me hetime të thella. S’kam dëgjuar gjë për aferën e ÇEZ dhe Gërdecin, ne respektojmë pavarësinë e sistemit të drejtësisë dhe SPAK. Unë po shpreh këndvështrimin tim para SPAK-ut”, tha Balla.

Mbremë kreu i SPAK, Arben Kraja, tha në një intervistë në RTSH se po hetohet për Sali Berishën për Gërdecin dhe për privatizimin e ish-kompleksit “ Partizani”.

Po kështu Kraja shtoi se po hetohet intensivisht edhe për Ilir Metën.