Balla: Ruçi, i pazëvendësueshëm në PS. Dade e Dokle u hapën rrugën të rinjve

Deputeti socialist, Taulant Balla, në një prononcim për mediat u shpreh sot se Namik Dokle dhe Arta Dade u hapën rrugë të rinjve me dorëheqjen nga kandidimi i tyre për kryesinë e re të PS.

“Z.Dokle dhe znj.Dade i hapën rrugën e të rinjve, duke dhënë dorëheqjen nga kandidimi për anëtar të kryesisë. Në PS ka gjithmonë një shkëmbim brezash. Një kolege shumë e nderuar, prej ditës së themelimit të PS-së, si kolegia Dade, ishte një prej kolegeve të propozuara për të qenë anëtare e kryesisë. Gjej rastin ta falenderoj për mesazhin që i dha Asamblesë së PS”, u shpreh Balla.

Ai theksoi gjithashtu se Sekretari i Përgjithshëm, Gramoz Ruçi është i pazëvendësueshëm në PS.

“Sa herë që bëhet fjalë për lista dhe pozicione mediat bëjnë atë që nuk është. Bie dakord me kryetarin e PS, me Asamblenë, nuk ka një kandidaturë tjetër që të zëvendësojë Gramoz Ruçi”, tha Balla.

Deputeti i PS Balla i cilësoi fyerje deklaratat e Ben Blushit për kandidatët për anëtar kryesie të PS. Sipas tij, me të tilla qëndrime Blushi ngjan gjithnjë edhe më shumë me Saliun.