Banorët marrin shtëpitë e reja në Thumanë, Rama thumbon PD-në: Kujdes bravën!

Kryeministri Edi Rama nuk i kurseu batutat në Thumanë kur iu dorëzoi banorëve shtëpitë e reja të rindërtuara. Duke ironizuar situatën në PD, Rama tha se qeveria i dorëzon sot atyre çelësin e shtëpive, por i dha porosi që të kenë kujdes bravat se nuk i dihet.

”Shtëpitë janë të gjitha falas. Në vendet e tjera u kërkohet kredi. Ndërkohë të gjitha familjet shqiptare do të marrin çelësin, titullin e pronës dhe do gëzojnë shtëpitë e tyre. Pa paguar as sot dhe as nesër asnjë qindarkë. Kuptohet se duhet të bëni kujdes për bravat. Se nuk i dihet. Po në rastin më të keq edhe sikur gjërat të ndryshojnë në vitet e ardhshme, do të ndryshoni ngjyrën e bravës, asnjë gjë tjetër nuk iu bëjnë dot. As t’ju vëjnë interesa kredie mbi shtëpinë”.

Po ashtu kryeministri tha se banorët do t’i kalojnë festat e fundvitit në shtëpi më të mira e më të sigurta se ato që kishin. Për Ramën, transformimi i Thumanës është i madh, teksa shton se pikërisht për këtë nivel transformimi po punohet për të gjithë Shqipërinë.