Bardh Spahia: Dinjitetin nuk ta jep pushteti. Shkodra do njerëz dinjitozë, jo sejmenë të kapur

Ish-deputeti i Partisë Demokratike Bardh Spahia ka reaguar pasditen e sotme lidhur me akuzat e ngritura nga selia blu ndaj Valdrin Pjetrit, njeriut që pritet të vendoset në krye të Bashkisë së Shkodrës.

Lidhur me këtë, ish-deputeti i Shkodrës, Bardh Spahia kujton se Shkodra do njerëz dinjitozë, jo njerëz të kapur.

Reagimi i plotë i Bardh Spahisë

DINJITETIN NUK TA JEP PUSHTETI

Figura e kujt pretendon të jetë qytetari i parë i Shkodrës është padyshim interes i çdo qytetari shkodran, i majtë apo i djathtë. Refuzimi i një pretendenti të tillë, me një të shkuar të errët në Itali, të cilën fillimisht e fsheh, e pastaj kur i zbulohet, nuk arrin ta justifikojë, por struket pas fuqisë së pushtetit, që mbron të ngjashmit e tij, është një detyrim qytetar i çdo shkodrani, i majtë apo i djathtë. Papërgjegjshmëria që e detyron të shmangë transparencën, duke përdorur klishe të lodhura, veçse fut në siklet atë 5% që e votoi në 30 qershor. Përveç të shkuarës së errët, duket se ka edhe një tjeter problem: si ish-prefekt, nuk flet dot në ajër për abuzime të bashkisë, pasi vendimet (abuzive apo jo) sipas ligjit shumica konfirmohen nga prefekti, si gjithmonë, përfaqësues i partisë në pushtet! As si përfaqësues i një mazhorance e i një kryeministri që nuk ka lënë vegël të këtij pushteti pa përdorur kundër Shkodrës dhe bashkisë së saj. Një figurë me të kaluar të errët është padyshim e keqja e Shkodrës, dhe abuzimi me fuqinë e pushtetit veçse diskretiton edhe më thellë atë vetë dhe PS-në, që vazhdon të kandidojë individë me probleme! Pretendenti në Shkodër thjesht po tregon devotshmëri, si pjesë e të njëjtit karvan të errët, që koha e ka treguar se nuk shkon dot larg! #ShkodraDoNjerezDinjitozeJoSejmeneTeKapur