Bardhi: Etilda Gjonaj duhet të thotë sot pse shkeli ligjin dhe Kushtetutën. SPAK të nisë hetimet

Sekretari i Përgjithshëm i Partisë Demokratike, Gazment Bardhi ka reaguar lidhur me akuzat e forta të Presidentit të Republikës Ilir Meta ndaj ministres së Drejtësisë, Etilda Gjonaj, së cilës i kërkoi që deri të hënë të paraqesë dorëheqjen e saj nga detyra, si pjesëtare e drejtëpërdrejtë në atë që kreu i shtetit e cilëson si grusht shteti të orkestruar nga vetë kryeministri Edi Rama.

Përmes rrjeteve sociale, Bardhi deklaron se nuk ka asnjë detyrë më të rëndësishme tani për SPAK sesa hetimi i krimit kushtetues për kapjen e Gjykatës Kushtetuese nga organizata mafioze në pushtet.

“Nuk ka asnjë detyrë më të rëndësishme tani për SPAK sesa hetimi i krimit kushtetues për kapjen e Gjykatës Kushtetuese nga organizata mafioze në pushtet. Në vend të lojërave me sms-të e shefit, Etilda Gjonaj duhet të thotë sot pse shkeli ligjin dhe Kushtetutën. Duhet të mos fshihet pas sms-ve të shefit, por të japë llogari pse veproi si sekretare e Ardian Dvoranit për të grabitur padrejtësisht një vend në Gjykatën Kushtetuese për llogari të Edi Ramës. Heshtja për krimin e kryer është pohim! Ai duhet hetuar dhe ndëshkuar!”, shprehet Gazment Bardhi.