Basha: 25 prilli, një masakër elektorale. Betejë për rrëzimin e regjimit në të gjitha frontet

Në një komunikim me gazetarët nga selia blu, kryedemokrati Lulzim Basha foli fillimisht për nisjen e stërvitjes ushtarake “Defender Europe 21”, ku i uroi Forcave të Armatosura që të mbajnë lart krenarinë kombëtare. Për 25 prillin, Basha tha se zgjedhjet janë një masakër elektorale dhe se ”viktimat” janë qytetarët, jo PD-ja. ”25 prilli është një masakaër elektorale. Besimi, shpresa që zgjuam, pavarësisht rolit të paprecedentë të krimit të organizuar dhe shkrirjes së vijave ndarëse të partisë dhe shtetit, nuk ja dolën dot”.

Po ashtu Basha tha se PD-ja ka mbledhur provat dhe se në këto zgjedhje, PD-ja bëri një betejë historike. Teksa i ftoi të gjithë mediat e lira të drejtohen tek treshja Rama-Doshi-Rakipi për të mësuar se si i morën votat deputetët e listës së zezë së Tom Doshit, por nuk lë pa përmendur deputetët e sapozgjedhur si Jurgis Çyrbja apo Ilir Ndraxhi.

”Si i morën votat 3 deputetët e Tom Doshit, të listës së zezë të DASH? Si i mori votat Vangjush Dako i listës së zezë të Departamentit të Shtetit bashkë me 3 përfaqësuesit e krimit të Durrës, Jurges Çyrbja, Plarent Dervishit me Rrahmah Rrajën e kokainës dhe Ilir Ndraxhit e Avdulajve? Si i mori votat djali i Aqif Rakipit dhe dhëndri i Aqif Rakipit, një nga familjet e njohura kriminale të Peqinit? Si i mori votat Aurora Mare, i Gent Mares, person në kërkim ndërkombëtar?”.

Deklarata e plotë e Lulzim Bashës

25 Prilli është një masakër elektorale viktima e të cilës nuk është Partia Demokratike dhe deputetët tanë, rezultati ynë flet qartë, besimi, shpresa që zgjuam dhe bashkuam pavarësisht prej rolit të pa precedentë të krimit të organizuar parave të pista të krimit dhe siç tha edhe raporti paraprak i OSBE-ODHIR-it, shkrirjes së vijave ndarëse midis partisë dhe shtetit nuk ja doli dot të zvogëlonte apo të ulte përmasat e një bashkimi të jashtëzakonshëm të shqiptarëve.

Detyrimi ynë i parë është para të gjithë shqiptarëve, jo thjesht dhe vetëm para kandidatëve për deputetë apo para militantëve, mbështetësve të Partisë Demokratike që kanë bërë një betejë historike duke pasur gjithçka kundër dhe ja kanë dalë në këtë betejë bashkë me të gjithë shqiptarët të rikthejnë shpresën dhe besimin se ky vend mund dhe do të ndryshojë.

Thënë kjo një gjë është e sigurt ndërsa ne vazhdojmë mbledhjen dhe faktimin e manipulimit të masakrës zgjedhore të 25 prillit. Të gjithë kamerat dhe mikrofonët e meidas së lirë do të drejtojnë pyetjet legjitime tek autori i kësaj masakre, te dyshja apo më mirë të themi treshja Rama-Doshi-Rakipi.

Si i morën votat tre deputetët e Tom Doshit të listës së zezë të Departamentit të Shtetit? Si i mori votat Vangjush Dako i listës së zezë të Departamentit të Shtetit bashkë me tre përfaqësuesit e krimit në Durrës Jurgis Çyrben e kokainës dhe Plarent Dervishin, me Rrahman Rrajën e kokainës dhe familjes së tij dhe klanit të tij kriminal dhe Ilir Ndraxhi i Avdylajve.

Si i morën votat djali i Aqif Rakipit dhe dhëndri i Aqif Rakipit, një nga familjet e njohura kriminale të Peqinit? Si i mori votat Aurora Mara e Gent Marës, person në kërkim ndërkombëtar për trafik droge? A mund të pranojë Shqipëria që nga njëra anë sot mban me krenari trashëgiminë e anëtarësimit në NATO gjatë kohës që qeveriste Partia Demokratike në këtë ushtrim të pa precedentë ushtarak, mban, pra, me krenari këtë peshë, këtë përgjegjësi që nga ana tjetër shkatërron themelet e demokracisë, viktimat e masakrës elektorale janë qytetarët shqiptarë.

Detyra jonë është të qëndrojmë fort dhe të luftojmë fort për rikthimin e demokracisë në vend i cili është një nga kushtet kryesore që bëri të mundur anëtarësimin e Shqipërisë në NATO dhe është një kusht i patejkalueshëm për të avancuar drejt asaj që kemi premtuar dhe do të bëjmë realitet me gjithë shqiptarët anëtarësimin e Shqipërisë në Bashkimin Europian. Kjo betejë do të bëhet në të gjitha frontet mënyrat dhe mundësitë që ekzistojnë dhe përfundimi i saj do të jetë i qartë, rrëzimi i regjimit Rama-Doshi-Rakipi dhe kthimi i Shqipërisë, shqiptarëve. Faleminderit.