Basha: Koha e pandemisë duhej të ishte përdorur për përfundimin e projekteve të rindërtimit

Kryetari i Partisë Demokratike Lulzim Basha në një intervistë në “ABC News” me Endri Xhafon si dhe me gazetarët Esjona Konomi dhe Fatos Hakorja deklaroi mbrëmjen e së hënës se në terren nuk ndjehet asnjë efekt i granteve dhe kredive të ofruara nga konferenca e donatorëve për rindërtimin.

“Shumica dërrmuese e atyre që ishin në çadra dimrin e kaluar, po kalojnë dimrin e dytë në çadra. Drama e të jetuarit në çadër për një vit është dëshmia më e qartë e keqmenaxhimit të fatkeqësisë. Pandemia e ka rënduar me tej gjendjen e banorëve më çadra. Koha e pandemisë duhej të ishte përdorur për përfundimin e projekteve të ndërtimit. Fati i këtyre njerëzve nuk ka përbërë prioritet për qeverinë. Prioritet i qeverisë, inceneratorët, tenderat sekretë. Në disa prej këtyre zonave, një pjesë e të moshuarve vuajnë nga sëmundjet e mushkërive për shkak të qëndrimit të gjatë në çadra. Largimi i Edi Ramës për në Emirate ishte largim nga problemi, sepse në Shqipëri nuk kishte bërë asgjë për t’i treguar publikut. Firmosja e një marrëveshjeje kredie nuk është një ceremoni shtetërore që kërkon praninë e kryeministrit.

Mentaliteti i propagandës mbi punën është konstantja e vetme e pushtetit të Edi Ramës gjatë 7 viteve. Nuk është detyrë e kryeministrit të dorëzojë çelësat e çdo shtëpie, kjo është punë bamirësish. Koha e pandemisë nuk pengon një qeveri të përgjegjshme, funksionale dhe që vendos njerëzit të parët që të përgatiste projektet. ”, deklaroi ndër të tjera, Lulzim Basha.

Kryedemokrati Basha garantoi qytetarët e dëmtuar nga tërmeti se:

“Çdo gjë që është bërë keq apo ngadalë në rindërtim do të përmirësohet dhe përshpejtohet që njerëzit të hyjnë në shtëpi sa më shpejt”, tha ai