Basha-Ramës: Të gjitha raportet ndërkombëtare i ke kundër. Jeni regjimi që s’ndryshon dot fytyrën
Duke renditur të gjitha raportet ndërkombëtare që tregojnë se kryeministri Edi Rama ka rrënjosur Shqipërinë, ka varfëruar qytetarët dhe ka fuqizuar oligarkët, kreu i PD-së Lulzim Basha tha se Edi Rama është e keqja e këtij vendi. Sipas Bashës, Shqipëria është vendi më i korruptuar në Ballkan, e ndërsa citon OKB-në, ai shprehet se vendi ynë është po ashtu edhe prodhuesi kryesor i hashashit në Europë. Ai shtoi se qeveria është shfaqja e një regjimi që nuk e ndryshon dot fytyrën e vet e as efektet negative që ka në jetën e çdo shqiptari.
“Sipas Eurostat, eksodi masiv i shqiptarëve ka konkurruar denjësisht me Asadin e Sirisë për azilkërkuesit që janë shfaqur dyerve të Europës nga keqqeverisja jote. Në vend të ulni kokën e të kërkoni ndjesë, keni pacipësinë të rrihni gjoksin. Mburrjet janë për qytetarët njësoj si t’i rrotullosh thikën në plagën që i ke hapur.
Sipas DASH Shqipëria cilësohet si vendi më i korruptuar i Ballkanit. Korrupsioni ka shkuar në nivelin e kapjes së shtetit. Për klimën e biznesit, Shqipëria renditet e fundit në Europë. Për OKB je prodhuesi kryesor i hashashit në Europë si i vetmi produkt me të cilin njihet qeverisja jote, ndërsa fermerët janë lënë pa mbështetje. Sipas UNESCO je në vendet më të ulëta për financimet për arsimin, më i ulëti për Shqipërinë në 20 vite.
Shqipëria është e fundit në Europë sa i përket shpenzimeve për mjekësinë. Kur pandemia trokiti në derë, qytetarët hynë në borxhe për të shpëtuar jetët e tyre. Borxhi publik ka dalë nga binarët, premtove se do ta ulje dhe e çove mbi 80%, më të lartin në Rajon, pa futur këtu PPP që nuk i konsideron si borxh dhe vetëm këto kanë kapur vlerën e 2 miliard eurove. Ti ke mashtruar. E sëmura e madhe Reforma në Drejtësi që mbahet e intubuar nga partnerët, por e goditur nga korrupsioni i kësaj pakice. Pyetja që ngrihet është ku i gjetët votat? Dhe përgjigjja vjen nga OSBE që konfirmon masakrën zgjedhore. Aty thuhet se ka patur vjedhje masive të votave dhe presion.
Edhe fondet e rindërtimit janë përdorur në këmbim të votës. Keni përdorur grupet më të zeza kriminale për të ushtruar presion ndaj zgjedhësve. Ndryshuat fletën e votimit që sollën një numër rekord votash të pavlefshme. Ata që kanë prodhuar këtë gjendje ekonomike, politike e sociale, ndalën dhunshëm ndryshimin. Kështu vdesin demokracitë, fiton autoritarizmi. Përbërja e kësaj pakice reale që hiqet si shumicë fiktive, është shfaqja e një regjimi që nuk e ndryshon dot fytyrën e vet e as efektet negative që ka në jetën e çdo shqiptari”, tha Basha.
