Basha: Shqipëria po rrënohet

Shqipëria po shkon krejt në kahun e kundërt me ato që pretendon dhe deklaron kryeministri Edi Rama. Ky ishte thelbi i deklaratës për shtyp të Lulzim Bashës pak orë pas konferencës me gazetarët të kryeministri Rama.

“Mburret Edi Rama, por në Europë ka nisur debati për kthimin e regjimit të vizave sepse të dëshpëruarit janë shtuar në dyert e Europës. Çfarë bilanci është ky?! Në cilën fantazi të kryeministrit paska 104 mijë vende të reja pune, ku çdo ditë shqiptarët e shohin që po shkurtohen vendet e punës?!”, deklaroi Basha.

Basha tha se ka rënie të investimeve të huaja, dhe kundërshtoi Ramën edhe për konsumin.

“Tha që është rritur konsumi, por TVSH, që është matësi më i mirë për ta treguar këtë, tregon të kundërtën.32 mln dollarë më pak nga janari i 2014-ës, ose 212 mln lekë më pak konsum se viti i kaluar.

Kreu i PD-së tha se qeveria nuk ka përmbushur as detyrimin ligjor; indeksimin e inflacionit. Në shëndetësi, vijoi Basha, situata është pak të thuhet skandaloze. “Çdo ditë vjedhje milionash me skema rimbursimesh, biznese dhe korrupsion edhe me jetën, me të sëmurët”, shtoi kreu i demokratëve.

“Zor se gjen sot një kryeministër që të sajojë me kaq dhunë një bilanc. Sot do të kishte qenë e udhës që Edi Rama të fliste për ndryshim kursi, për ulje taksash, por siç e dëgjuat asnjë fjalë për hallet e vërteta të Shqipërisë dhe shqiptarëve”, tha Basha.

Deklaratën e kësaj të enjte të kryeministri Rama, Basha e cilësoi “qershi mbi tortën e madhe të gënjeshtrave”.

Duke u ndalur tek dekriminalizimi, Basha akuzoi edhe njëherë tjetër Ramën se po pengon qëllimisht këtë proces, “për të mbrojtur personat me të cilët ndan sofrën e pushtetit.

“Për të dënimi i Ndokës për prostitucion është një ngatërresë, Bushi është sajesë e medias së huaj, Elvis Roshi në zvicër është çështje emrash. Rama e di fare mirë kë ka ulur në sofrën e pushtetit, ndaj ka penguar dhe pengon, gënjyer dhe gënjen SHBA duke rrezikuar marrëdëhniet strategjike, sepse për të më strategjikë janë marrëdhëniet me kriminelët”, deklaroi Basha.

Në fund, kreu i demokratëve shprehu vendosmërinë  e opozitës për t’i shkuar deri në fund procesit të dekriminalizimit./Top Channel