Bashkëpunim me qeverinë? Duka: PAA nuk do mbetet peng i problematikave brenda PD-së

Kreu i PAA-së, Agron Duka, i njohur për fuqinë e tij politike në qarkun e Durrësit, nuk e ka përjashtuar mundësinë e bashkëpunimin me qeverinë ”Rama 3” në të ardhmen për interesa të qytetarëve që e kanë votuar. Ai tha se nëse opozita do të vijojë që të ketë të njëjtat probleme, atëherë PAA-ja nuk mund të rrijë peng i këtyre problematikave.

“Ka kohë për zgjedhjet parlamentare, por nëse opozita mund të ketë të njëjtat probleme, PAA është e hapur të bashkëpunojë me PS-në edhe nëse nuk dua unë. Nuk mund të rrimë peng të problematikave që mund të ketë opozita. Ne kemi çuar një projektligj për bujqësinë që u përkrah edhe nga deputetët e mazhorancës, por nuk u aprovua”,-u shpreh Duka në Report TV.

Për Dukën situata brenda opozitës dhe përçarja në Partinë Demokratike do të përfundojë vetëm kur drejtuesit të lënë mënjanë egot e tyre personale. Sa i takon rezultatit të dobët të koalicionit ”Bashkë Fitojmë”, Duka tha se nuk e priste diçka të tillë, duke u shprehur se mendonte që opozita do të fitonte deri në 15 bashki.