Beleri rrezikon burgun, ministri grek Dendias takon ballë për ballë Olta Xhaçkën

Çëshjen e Fredi Belerit, qeveria greke e ka marrë si problem të tyren. Ministri i Jashtëm grek, Nikos Dendias është takuar këtë të hënë në Bruksel me ministren e Europës dhe Punëve të Jashtme, Olta Xhaçkën.

”Në takimin e sotëm në Bruksel, pata një bashkëbisedim me homologen time shqiptare, Olta Xhaçka. Çështja e kryebashkiakut të zgjedhur të Himarës, Fredi Beleri, u prek në diskutimin tonë”, shkruan Dendias në rrjetin social.

Fredi Beleri, kandidati i koalicionit “Bashkë fitojmë” u arrestua në minutat e para të 12 majit, për akuzën e “korrupsionit aktiv në zgjedhje”. Sipas Prokurorisë së Vlorës, Beleri ka dhënë dhe premtuar shuma monetare personave të ndryshëm, me qëllim blerjen e votës.

Akuza ndaj tij u mbështet në disa filmime dhe përgjime mes tij dhe një të infiltruari, të cilit iu premtuan 400 mijë lekë të vjetër për 8 vota. Avokati i Belerit pretendoi se akuzat ndaj klientit të tij janë të montuara dhe të motivuara politikisht.