Berisha-Bardhit: Lodheni kot! Revolucioni nuk ndalet me falsifikime

Sekretari i Përgjithshëm i PD-së, Gazment Bardhi në konferencën për shtyp, pretendoi se Kuvendi i 11 dhjetorit nuk ka mbështetjen e delegatëve pas mbi 69% e tyre do të jenë pjesë e Kuvendit të 18 dhjetorit, të thërritur nga Kryesia. Ish-kryeministri Sali Berisha i është përgjigjur, duke i thënë se me falsifikime revolucioni nuk ndalet dhe se ata lodhen kot. ”Sot në një krizë paniku në ditën e fundit si kryetar Basha, nxorri Gaztorin e tij për të lexuar një listë që po denoncohet nga shumë demokratë si e falsifikuar dhe ku duket qartë fryrja fiktive e mandateve të qarqeve krahasuar me Kuvendin e fundit”,-shkruan Berisha.

Reagimi i plotë nga Sali Berisha

Për javë me radhë demokratët nga gjithë Shqipëria, degë pas dege kanë publikuar me gojën e tyre emrat e delegatëve që kanë firmosur për thirrjen e Kuvendit të parë në historinë e vendit, qe mblidhet me kërkesën e anëtarësisë.

Sot në një krizë paniku në ditën e fundit si kryetar Basha, nxorri Gaztorin e tij për të lexuar një listë që po denoncohet nga shumë demokratë si e falsifikuar dhe ku duket qartë fryrja fiktive e mandateve të qarqeve krahasuar me Kuvendin e fundit. Lexohen emra pa u shoqëruar me funksionet e tyre përkatëse, apo së cilës degë i përkasin. E gjitha kjo për të krijuar turbullirë në vend të transparencës me shpresën se do krijojnë konfuzion!

Lodhen kot! Revolucioni nuk ndalet me falsifikime. Asgjë nuk mund ta ndalë vullnetin e mijëra delegatëve demokratëve për të marrë pjesë në Kuvendin e rithemelimit, i cili do shkëpusë përfundimisht Partinë Demokratike nga pazaret Rama-Basha, duke ja kthyer atë demokratëve!

Ftojmë të gjithë demokratët dhe delegatët e Kuvendit të bashkohen në Ditëlindjen e Partisë Demokratike për të dalë nga rrethi vicioz i humbjeve dhe për të nisur rrugëtimin tonë drejt FITORES!