Berisha për tërheqjen e Ramës nga vendimi për fashën prej 800 kwh të energjisë: I pata vënë ultimatum
Kryetari i PD-së, Sali Berisha komentoi sot vendimin e kryeministrit për t’u tërhequr nga rritja e çmimit të energjisë në 1 tetor.
“U dorëzua, para jush i kam dhënë ultimatum në mënyrë të përsëritur. Po rrite çmimin e energjisë do presësh reagimin tonë. Sidoqoftë vendimi i tij për t’u tërhequr nën presion do të thotë se vetëm presioni funksionon me këtë njeri. Guxoi por nuk guxoi, u palos!
Kjo është e vërteta. Sa i përket inflacionit, është mjeran ai në ekonomi. Nuk është ekonomia shgarravinë, vizatim. Ujërat tona nuk kanë asnjë lidhje me luftën, nuk ndikohen çmimi i energjisë nga lufta atje. Po marrim naftën, por pse në Mal të Zi shitet 900 lekë më lirë se në Shqipëri? T’u tregojë shqiptarëve.
Rritja e çmimeve është si rezultat i bordeve. Nuk ka lidhje me luftën rritja e çmimit te djathit dhe të qumështit por me Ballkanin e Hapur, vërshimi i produkteve serbe drejt Shqipërisë. Unë nuk them se lufta nuk ka patur ndikim, por kurrë në këtë formë. Ai nuk është i pafajshëm nga injoranca sepse kur nuk di, ik dhe shko në punë tëndë, mos merr në qafë një vend”, tha Berisha.
