Berisha: Rama e mori mesazhin për Parlamentin. 20 Shkurti, dita e provës së madhe në Tiranë

Sali Berisha i cili është në ”arrest shtëpie” prej 36 ditësh, tha këtë mbrëmje të së martës para mbështetësve se opozita nuk do të dorëzojë kurrë Parlamentin. Ai shtoi se edhe se kryeministri Edi Rama e mori mesazhin e qartë nga protesta. Ish-kryeministri akuzoi qeverinë se po vepron si organizatë kriminale,  bëri thirrje që më 20 shkurt të dilet në protestë, duke e cilësuar si dita e provës dhe betejës së madhe në Tiranë.

Pjesë nga fjala

A e dëgjuat Arben Ahmetajn në rrëfimin e tij rrëqethës për çdo shqiptar? Kanabizimi i vendit, velloja e tmerrshme e krimit që mbuloi Shqipërinë, ka një autor, kë një arkitekt, dhe ky është Edi Rama. A e dëgjuat miqtë e mi kur tha se po të hetohen djegësat, përfshihen nivelet maksimalisht më të larta, dmth Edi Rama, dhe shqiptarët do llahtarisen?

Pra, atë që kemi thënë me qindra herë që Edi Rama drejton një organizatë kriminale që quhet qeveri, dhe që nuk mund ta thonim kurrë po të mos ishte e vërtetë, atë e tha numri dy i qeverisë, e tha Arben Ahmetaj. Të dashur miq, në qoftë se më pyesni mua, pse e ke thënë këtë, pse je shprehur në këtë mënyrë, nga e dije ti Sali se kjo funksiononte si organizatë kriminale? Po mor miq, sepse në qoftë se një kryeministër vendos për t’i dhënë 8 pike një kompanie që nuk ekziston, dhe që një ministër i ka thënë se kompania nuk ekziston, një ministër tjetër i ka thënë me shkrim se kjo nuk është tagër i qeverisë, dhe ai e firmos dhe bashkë me të firmosin edhe ministrat e tij, a nuk është ky një krim i përbashkët, a nuk është kjo një organizatë kriminale?

Më keni dëgjuar t’i them Dumanit se drejton organizatë kriminale, po mo po, kriminale, shumë të rrezikshme, sepse vjedhjen e shekullit, vjedhje në të cilën Edi Rama, Engjëll Agaçi, Artur Metani, Erion Veliaj, Damian Gjiknuri, Arben Ahmetaj, Lefter Koka, etj, kanë vepruar si një organizatë kriminale duke dëmtuar vendin në 30 vite 1 miliard. Duke zhdukur gjer sot 200 milionë euro për tre djegësa që nuk ekziston asnjëri.

Të gjitha këto i mbulon Dumani, i mbulon Kraja. A e dini se çfarë ndodh në Skapin e partisë miq? Ua them unë. Zihen si cackej njëri me tjetrin, pse nuk arreston ti këtë, nuk arrestoj unë atë, pse mbron ti këtë, unë do të mbroj atë. Ky është sot Skapi dhe vërsulet si hiena kundër opozitës. Por, 20 shkurti është dita e revoltës, është dita e qytetarëve, dita e fitores. Rrofshi ju, rroftë fitorja, rroftë Shqipëria, rroftë Dibra! Fitore, fitore, fitore!