Berisha takim në Valias: Kemi përfaqësimin më dinjitoz që qytetarët meritojnë

Sali Berisha prezantoi këtë pasdite kandidatin e koalicionit “Bashkë Fitojmë” për bashkinë Kamzë. “Unë vij tek ju për të paraqitur kandidatin tuaj për kryetar bashkie, Arjan Hoxha. Arjani nuk është kandidat i kryesisë së partisë, as i kryetarit, por është kandidat i votës tuaj, i vendimit tuaj, i besimit tuaj dhe është kandidat i dinjitetit tuaj”, tha Berisha.

Duke u ndalur tek qeverisja socialiste, ai tha se Edi Rama vetëm për maskuar vjedhjet e tij, vetëm për të larguar nga vëmendje dramën që ka krijuar, është i gatshëm të marrë edhe lëkurën e gomarit e të vë dhe zorrë rreth qafe në mënyrë të mos diskutojmë bashkë për këto që u ka krijuar qytetarëve.

“Ky zotëri që vjen tek ju, me një fjalor ordineri, në mediet e huaja, sapo ka deklaruar se, nuk ka kuptim Shqipëria në BE, pa Serbinë. Shikoni çfarë antishqiptari është ky, çfarë argati i shpifur i Beogradit.

Serbia e ka të lidhur fatin me Rusinë dhe ky na lidh pas bishtit të Serbisë ne dhe merrte një përgjigje shembullore nga një shtetar evropian; të dëgjosh kryeministrin e Shqipërisë që thotë se nuk ka kuptim anëtarësimi i vendit të tij në BE pa Serbinë, kjo është habia e kohës. Nuk ka interesa shqiptare. Ka absolutisht interesa antikombëtare. Nuk do të ndalemi këtu, sepse ju e keni shumë të qartë se çfarë përfaqëson ai për veriun”, deklaroi Berisha.