Berisha: Të shpëtojmë Durrësin, porti është kthyer në një kantier për pastrimin e parave të drogës

Edhe pse jo zyrtarisht pjesë e zgjedhjeve të pjesshme lokale të 6 marsit, sot Sali Berisha me grupin e Rithemelimit, prezantoi nga Sukthi kandidatit e koalicionit “Shtëpia e Lirisë” për qarkun e Durrësit. Berisha foli për aferat korruptive në këtë qytet, duke sjellë në vëmendje atë të fundit, projektin e Portit të Durrësit që për të është vetëm një kantier për pastrimin e parave të drogës.

“Kjo qeveri në mënyrën më të papërgjegjshme, pas një sage në një nga aferat më të mëdha të Europë, duke prerë kafshatën e mbi 12 mijë familjeve që ushqeheshin në Port, për të shndërruar 800 mijë metra katrorë në një zonë ndërtimesh.

U tha për Emarin, por tani del për Edvinin dhe Lul Bravën, për të larë miliarda para droge. T’ia presin me sëpatë 3 mijë vite histori. Babëzia, lukunia nuk ka fund te këta njerëz. Nuk ka qëndrim më armiqësor ndaj qytetarëve të Durrësit dhe shqiptarëve”.

Për ish-kryeministrin qeverisja e Vangjush Dakos dhe Edi Ramës e ka kthyer Durrësin në kryeqytetin e betonit. Kurse kandidati i “Shtëpisë së Lirisë”, Ardian Muka u bëri thirrje qytetarëve të largojnë me vote atë që sundojnë në bashki dhe që kanë përdorur qytetin për interesat mafioze.