Betimi i Përparim Kalos, Soreca: Punë të mbarë Gjykatës Kushtetuese

Ambasadori i BE-së në Tiranë, Luigi Soreca, thotë se me betimin e Përparim Kalos në Presidencë, Gjykata Kushtetuse tashmë është funksionale, dhe këtë e quajti një arritje për Shqipërinë.

”Sot z. Perparim Kalo është betuar nga Presidenti si Anëtari i 6-të i Gjykatës Kushtetuese. Ne e përgëzojmë atë dhe i urojmë punë të mirë atij dhe të gjithë anëtarëve pasi Gjykata tani është funksionale, një arritje e konsiderueshme për Shqiperine, qytetarët e saj dhe drejtësine ne reformë”,-shkruan Soreca.

Perparim Kalo është anëtari i gjashtë i Gjykatës Kushtetuese i cili u betua diten e sotme, duke e bërë tanimë këtë gjykatë funksionale dhe duke përmbushur një kërkesë të ndërkombëtare për vënien në funksion brenda këtij viti. Gjykata Kushtetuese e përbërë nga nëntë anëtarë dhe e themeluar në vitin 1992, doli jashtë funksioni në korrik të vitit 2018.