Blerim Çela: PD s’vjen në pushtet sa të jetë Berisha. Rama po bëhet si Saliu

Njëri ndër themeluesit e Partisë Demokratike, ish-deputet i saj dhe ish-kryetari i parë i Kontrollit të Lartë të Shtetit, Blerim Çela thotë se për sa kohë Berisha do të ketë influencë në Partinë Demokratike, PD nuk do të vijë në pushtet.

I ftuar në emisionin “Ditë e Re” të Ora News për të promovuar ribotimin e librit:
“Deformimi i Partisë Demokratike”  Blerim Çela thotë se  “ Për sa kohë Berisha do të ketë influencë në Partinë Demokratike, PD nuk do të vijë në pushtet. Berisha është opozita e gjallë e PD-së  sot për sot por nuk i shërben me atë mënyrë të të foluri, pasi është bërë i mërtizshëm. Nuk ka pse futesh në familjet e deputetëve. Nëse ka akuza për korrupsion   çoji në prokurori nëse prokuroria nuk e bën të kërkojë shkarkimin, e ka tagrin, por nuk mund të merret me familjet e deputetëve. Opozita duhet bërë por me zotnillëk”

Çela ka dhe një shpegim dhe një fajtor se pse Parlamenti është në këtë gjëndje:

“Parlamenti i vitit 1992-1996 ishte parlamenti më i shkolluar, nga të dy kahet e politikës ishin njerëz intelektualë, por kjo mori fund me ndryshimet kushtetuese të 1998 të firmosura nga Rama e Berisha, ku listat e deputetëve i bënin kryetarët. Listat i kanë bërë ashtu siç I leverdisnin atyre dhe jo sipas mundësive dhe meritave që kishte secili prej nesh për tu përballur me kundërshtarin në zgjedhje.

Sot primadona e parlamentit është Berisha. Për dy arsye.  E para është se ai ka shumë informacion, artikulon mirë dhe i thotë gjërat me guxim, pavarësisht se kam kontestimet e mia si flet. E dyta më duket se është lojë e Ramës dhe e Metës. Meta për ti thënë Berishës që unë të lë të flas, ndërsa Rama i thotë Metës lëre të flasë që ai të diskretitohet përmes fjalëve të tij”  

Ka dhe një opinion për PS-në

“E majta u reformua dhe u bë parti demokrate me katarsisin e Nanos, Rama po e mbyll si Sali Berisha”

“ Deformimi i Partisë Demokratike”

Në librin e tij tregon historinë e Partisë Demokratike që nga themelimi, mocioni i mosbesimit deri në ditët e sotme.

Mes dilemave nëse botimi librit indirekt do të ndihmonte PS-së, ka fituar qëllimi: “T’i shërbejë demokratëve duke treguar si duhet të jetë PD që njëshi të mos ketë mundësi të jetë gjithmonë në krye dhe të jetë ai I vetmi vendimarrës”

Në studion e “Ditë e Re” të Ora News Blerim Çela tha: “E kam dashur shumë Berishën, jo vetëm unë por të gjithë demokratët që e kishim afër prandaj jam zhgënjyer shumë”

Ndërsa  mes rreshtave të librit shkruan: ’Ai qe më i zoti se ne. Me dinakëri na mbajti afër. Na mashtroi me frazeologji antikomuniste fuqizoi pushtetin përmes nesh dhe na largoi pjesë pjesë”