Blushi: Alibia e neveritshme e Dvoranit për t’i shpëtuar drejtësisë

Zëdhënësi i Presidentit të Republikës, Tedi Blushi, ka reaguar sot pas interesimit të mediave, lidhur me qëndrimin e kreut të KED, Ardian Dvorani.

Kreu i KED deklaroi dje se nëse ai do merrej i pandehur nga prokuroria për shkeljet e rënda ligjore që ka denoncuar kreu i shtetit, atëherë sipas tij do bllokohej puna e Këshillit të Emërimeve në Drejtësisë. Këto pretendime të Dvoranit, Blushi i cilësoi si alibi e neveritshme për t’i shpëtuar drejtësisë.

Koment i plotë Zëdhënësit të Presidentit të Republikës, Tedi Blushi:

I pyetur nga gazetarët në lidhje me pretendimin e Ardian Dvoranit se, nëse ai do të merrej i pandehur nga Prokuroria, atëherë kjo do të sillte bllokimin e funksionimit të KED-së, Zëdhënësi i Presidentit të Republikës, zoti Tedi Blushi sqaroi se:

Kjo është një alibi e neveritshme për t’i shpëtuar drejtësisë për veprat penale që Ardian Dvorani ka konsumuar dhe për të cilat është kallëzuar penalisht në Prokurori.

Ligji nr. 115/2016, për funksionimin e Këshillit të Emërimeve në Drejtësi e ka zgjidhur shumë mirë këtë situatë në nenin 227 të tij, ku parashikon se “Anëtari më i vjetër në moshë nga Gjykata Kushtetuese është Zëvendëskryetari i KED-së. Zëvendëskryetari ushtron të gjitha funksionet e Kryetarit në mungesë ose pamundësi të këtij të fundit”.

Nuk është përgjegjësia penale e Ardian Dvoranit, që mund të bllokojë funksionimin normal të KED, por u bllokua qëllimisht funksionimi i KED për dy vite radhazi, që në krye të këtij organi të vihej Ardian Dvorani, për të konsumuar të tilla shkelje të rënda kushtetuese dhe ligjore.

Edhe mbledhja e djeshme e KED-së, e zhvilluar duke njoftuar dy Rende Dite të ndryshme, një të njoftuar publikisht dhe një të ndryshëm të njoftuar anëtarëve dhe pjesëmarrësve në Këshill, është një tjetër e dhënë e papërgjeshmërisë së këtij individi , përkundrejt zbatimit të parimit të transparencës së ushtrimit të detyrës ashtu sic kushtetuta dhe ligji ia kërkon.