Blushi: Në PS ka referendum, por s’ka garë dhe as fushatë

Deputeti i Partisë Socialiste Ben Blushi sërish ka bërë kritika për mënyrën e organizimit të partisë ku ai bën pjesë.

Kësaj radhe, ai ka kritikuar votimin për kryetarin e partisë, çështje kjo që do të zgjidhet përmes referendumit të caktuar më 9 prill, ku të gjithë socialistët do të votojnë nëse Edi Rama duhet të vazhdojë të jetë kryetar i PS sipas modelit laburist apo duhet të bëhen zgjedhje për kryetar të ri pasi i ka përfunduar mandati.

Ben Blushi nuk beson tek rezultati i referendumit, pasi thotë se rezultati që do të dalë është i trukuar dhe do të vendoset në tavolinë.

“Në Partinë Socialiste nuk është votuar, askush nuk e di sa vota janë për secilën palë. Ky Kongres me imponim i ka hequr PS-së të drejtën e votës dhe të gjitha ata kanë një llogari të pambyllur me historinë.

Sa i takon referendumit, duhet të pyesni ata që kërkuan referendumin pse nuk bëjnë fushatë. Nuk ka në botë njeri që kërkon referendum dhe nuk bën as fushatë. E di pse? Sepse ky ka për të qenë rezultat i trukuar, rezultati do shkruhet në tavolinë. Nuk ka fushatë, nuk ka vëzhgim të këtij procesi”, tha deputeti Ben Blushi.

I pyetur në lidhje me debatin për ndërtimet brenda parkut të liqenit të Tiranës, deputeti socialist u shpreh se është fatkeqësi që dy partitë më të mëdha politike në vend merren me një kënd lojrash, kur ndërkohë bisedimet për reformën në drejtësi kanë ngecur.