Bomba e Kukan nga Brukseli: Të gjithë e dimë se droga në Shqipëri është një çështje shumë e madhe

Shndërrimi i Shqipërisë në një “parajsë” për narkotrafikantët, mbjellja dhe trafiku i drogës, prej kohësh  është kthyer në çështjen më të nxehtë të debatit politik, por edhe mediatik dhe të shoqërisë civile.

Këmbënguljen e kryeministrit Rama, se vendi nuk ka aq shumë drogë sa pretendon opozita dhe “media e kazanit”, çdo ditë e hedhin poshtë sasitë e mëdha të kanabisit të kapur në brigjet italiane dhe përgjatë kufirit me Greqinë.

Por deri tani kryeministri është fshehur mbrapa heshtjes së “habitshme” të ndërkombëtarëve për një realitet që e shohin dhe dinë të gjithë. Edi Rama sa herë që akuzohet se vendi është shndërruar në një plantacion gjigant të kultivimit të kanabisit, nxjerr si mburojë raportet e vjetra të ndërkombëtarëve dhe kryesisht të amerikane. Që droga në Shqipëri është një çështje shumë e madhe, këtë e ka pohuar sot nga Brukseli për ABC News, edhe eurodeputeti Eduard Kukan nëpërmjet  një deklarate.

“Jam shumë mirë i informuar për këtë çështje. Çështja e drogës është një problem gjigant për vendin. Qeveria dhe autoritete përkatëse duhet të tregojnë një qasje të pamëshirshme ndaj këtij problemi, sepse përndryshe do të ishte shumë e vështirë që të ndryshohej imazhi ndërkombëtar i Shqipërisë. Është një çështje shumë e madhe dhe mendoj se duhet të vihen në dispozicion të gjitha burimet e nevojshme për t’i dhënë fund këtij fenomeni, sepse është vërtet një çështje shumë e madhe dhe të gjithë këtu e dinë”, tha Kukan duke vërtetuar se pavarësisht heshtjes deri tani, ndërkombëtarët janë në dijeni të situatës.