Braimllari: Policia sot drejtohet nga Rama, Lleshaj u përdor
Sekretari i Përgjithshëm i LSI-së, Endrit Braimllari i ftuar në emisionin “7pa5” në Vizion Plus, foli për dorëheqjen e Sandër Lleshajt nga funksioni i Ministrit të Brendshëm. Braimllari theksoi se ky largim nuk kishte të bënte më ngjarjen e rëndë që ndodhi, pavarësisht se u shit si largim që kishte lidhje me vrasjen e 25-vjeçarit, Klodian Rasha nga ana e efektivit të repartit ”Shqiponja”.
”Policinë e Shtetit sot e drejton Edi Rama. Edhe largimi i Sandër Lleshit nuk është largim që ka ndodhur për ngjarjen, pavarësisht se po e shet Edi Rama që ka ndodhur për ngjarjen. Sandër Lleshi ka 6 muaj apo një vit që ka pasur dëshirën e tij për të dhënë dorëheqjen sepse është thjesht një kukull në dorën e Edi Ramës dhe nga një gjeneral me grada, përfundoi në pension të parakohshëm, duke u përdorur në mënyrën më të keqe nga një kryeministër. Nëse sot ka një Ministër të Brendshëm, i cili është përdorur në mënyrën më të keqe, ai është Sandër Lleshi, i cili në drejtimin e tij të policisë, sigurisht që do thoni që ministri është politik dhe policia është teknike, por jo. Ky zotëri ka futur frymën e Edi Ramës te Policia e Shtetit. Ju kujtoj ngjarje shumë të rënda tek Unaza e Re, me gaz lotsjellës, me shkopa gome, me ndërhyrjen e shpejtë, ka dhunuar banorët e Unazës së Re. Pse? Sepse kërkonte që të mbronte hajdutërinë e Edi Ramës, Damian Gjiknurit dhe të gjithë qeverisjes së tij. Në 5 të mëngjesit te Bulevardi i Ri, futi ndërhyrjen e shpejtë, dhunoi gra, të mitur, me gaz helmues brenda shtëpisë së tyre. Kishte të mitur në shtëpi. Nuk ka ndodhur me asnjë ministër tjetër të brendshëm kjo që ka ndodhur në kohën e Sandër Lleshit, por edhe të gjithë qeverisjes së Edi Ramës”, u shpreh Braimllari.
Nga ana tjetër, Braimllari komentoi edhe protestat e zhvilluara nga të rinjtë, të cilat i cilësoi si një akumulim i papërgjegjshmërisë, arrogancës dhe negativitetit të qeverisë së Edi Ramës.
”Këto protesta që po ndodhin në Tiranë, janë kulmi i akumulimit të një energjie negative, papërgjegjshmërie, arrogance, të një qeverie si kjo e Edi Ramës. Është kulmi i një qeverie moniste. Ka kapur çdo institucion, ka përdorur çdo strukturë në funksion personal të Edi Ramës. Këtë nuk e përballojnë dot të rinjtë. Përballë kësaj ata kanë reaguar. Pra të mos e shikojmë thjesht si një reagim spontan. Nisi nga një ngjarje shumë e rëndë dhe ata kërkojnë drejtësi, sepse protestën e nisën shokët e djalit që u ra nga dora e shtetit dhe pastaj kulmoi me të rinjtë dhe të rejat e Tiranës. Ne kemi kushërinjtë tanë gjimnazistë që na thonë jemi në protestë, pse nuk vini. Pra ato kërkojnë të sensibilizojnë për këtë gjë. Ato kanë sensibilizuar edhe prindërit e tyre për këtë gjë dhe të jeni të bindur pjesa më e madhe e tyre i kanë prindërit punonjës të administratës publike. Pra ky është reagim mbi partitë politike, por Edi Rama kërkon ta politizojë, ta fusë në linjën e politikës, me qëllim që të bëjë pis dhe atë reagim, por mbi të gjitha t’i ikë edhe ngjarjes së rënë”.
