Brukseli sqaron: PAMECA rol këshillues për institucionet ligjzbatuese

Raporti i misionit PAMECA, që vinte në dukje mangësitë e punës së prokurorisë për disa çështje delikate, nuk është më vetëm një çështje e brendshme. Vetë prokuroria heshti pas publikimit nga media të raportit kritik, por jo Presidenti Bujar Nishani, i cili e quajti qëndrimin e PAMECA-s të papranueshëm.

“PAMECA ka dalë jashtë statusit të parashikuar për këtë mision për të cilën ajo ka ardhur në Shqipëri dhe duke dalë jashtë statusit ajo ka shkelur marrëveshjen me shtetin shqiptar. Ndaj, unë mendoj që kjo është një çështje që i takon tashmë trajtimit të autoriteteve që kanë mbikqyrjen dhe monitorimin e misionit të PAMECA-s në Bashkimin Europian”, tha Nishani.

Por ndaj ketij qednrimi ka reaguar sot Komisioni Europian. Në një komunikim me Top Channel, zëdhënësja e Komisionit Europian nuk pranoi të komentojë përmbajtjen e raportit të PAMECA-s, si një dokument i papublikuar zyrtarisht.

“PAMECA IV siguron mbështetje teknike dhe këshillim ligjor për Ministrinë e Brendshme, Policinë e Shtetit, Zyrën e Prokurorit të Përgjithshëm dhe agjensive të tjera ligjzbatuese. Raportet dhe analizat e PAMECA-s nuk janë për diskutim publik, por ato përfaqësojnë këshilla drejtuar institucioneve ligjzbatuese në këtë sektor”, tha zëdhënësja.

Komisioni Europian beson se “PAMECA ka ndërtuar bashkëpunim dhe dialog shumë të mirë me institucionet përfituese në Shqipëri”, përfshirë prokurorinë, “duke mbështetur përpjekjet e tyre në luftën kundër krimit të organizuar dhe korrupsionit”.