Bushati në Nju Jork: Arsimi rol afatgjatë kundër terrorizmit

Në kuadër të zhvillimit të punimeve të Asamblesë së Përgjithshme të OKB-së në Nju Jork, ministri i Jashtëm, Ditmir Bushati mori pjesë në aktivitetin “Lufta kundër radikalizmit dhe ekstremizmit të dhunshëm përmes edukimit”, i inicuar nga pala shqiptare, në bashkëpunim me SHBA-në, Vatikanin, Jordaninë, Marokun dhe UNESCO-n.

Të pranishmit ndanë pikëpamje mbi ecurinë dhe koordinimin e përpjekjeve në luftën e përbashkët kundër terrorizmit dhe ekstremizmit të dhunshëm, si dhe rolin e agjencive ligjzbatuese, edukimit, medias, komuniteteve fetare dhe masave të ndërmarra nga qeveritë respektive në këtë drejtim.

Ministri i Jashtëm i njohu të pranishmit me angazhimet dhe kontributin e vendit tonë në luftën kundër terrorizmit dhe ekstremizmit të dhunshëm, duke u ndalur në hapat shtesë që Shqipëria po ndërmerr në parandalimin e shkaqeve të radikalizmit, veçanërisht në futjen e kurrikulave për tolerancën fetare në tekstet shkollore dhe forcimin e rolit të institucioneve arsimore, si kontribues të kohezionit shoqëror.

Qeveria shqiptare i kushton një vëmendje të madhe rolit të arsimit në përballimin e fenomenit, duke i konsideruar shkollat jo vetëm si institucione arsimore, por edhe si katalizatorë të zhvillimit dhe kohezionit social.

“Arsimi është ndoshta veprimi më i plotë dhe afatgjatë, ku qeveritë tona duhet të investojnë për të ndërtuar breza të ardhshëm të fortë dhe rezistentë në përballimin e kërcënimeve të tilla”, u shpreh Bushati.

Duke u ndalur në sfidat dhe rezultatet e arritura në luftën kundër këtij fenomeni, ai nënvizoi angazhimin e Shqipërisë, në përpjekjet globale për t’iu kundërvënë ekstremizmit të dhunshëm dhe radikalizmit, si brenda ashtu dhe jashtë vendit.

“Ne thuajse kemi zeruar numrin e luftëtarëve të huaj nga Shqipëria gjatë vitit të fundit. Edhe pse koalicioni global kundër të ashtuquajturit Shtet Islamik ka bërë përparime, Shqipëria, ashtu si pjesa tjetër e vendeve të rajonit, tani po përballet me sfidat që paraqesin të kthyerit nga zonat e luftimeve”, tha ministri i Jashtëm.

Të pranishmit shprehën rëndësinë e vijimit të bashkërendimit të përpjekjeve globale në luftën kundër terrorizmit dhe ekstremizmit të dhunshëm, si dhe hartimit e zbatimit të paketave të posaçme strategjike, sociale, politike, ligjore, edukative dhe ekonomike që kanë rezultuar të suksesshme në luftimin e fenomenit.