Busti i Skënderbeut në Budapest, Meta: Simbol i rifreskimit të bashkëpunimeve mes dy vendeve

Busti i heroit tonë Kombëtar, Gjergj Kastriot Skënderbeu është vendosur sot në qytetin e Budapestit. I pranishëm në ceremoninë e zhvilluar, Presidenti Ilir Meta shprehu mirënjohjen për mbështetjen e vazhdueshme që Hungaria i ka dhënë Shqipërisë në kuadër të proceseve integruese në NATO dhe Bashkimin Europian. ”Vlerësuam se mundësitë e bashkëpunimit ekonomik janë ende të pashfrytëzuara aq sa duhet dhe se shkëmbimet tregtare, ekonomike dhe turistike janë ende larg mundësive të prekshme”,-shkruan Meta në facebook. Po ashtu kreu i shtetit e cilëson si simbol të rifreskimit të bashkëpunimeve të ngushta mes dy vendeve, Shqipëri-Hungari.

Postimi i plotë

Mikpritje e ngrohtë dhe miqësore në Budapest, nga homologu im, Janos Ader. I lumtur të konfirmonim se marrëdhëniet e shkëlqyera, historike dhe tradicionale mes dy vendeve dhe popujve tanë meritojnë të forcohen dhe të thellohen më tej, në të gjitha fushat me interes të përbashkët.

Shpreha mirënjohjen e thellë për mbështetjen e vazhdueshme, që Hungaria i ka dhënë Shqipërisë në kuadër të proceseve integruese në NATO dhe Bashkimin Europian, që na ka motivuar më shumë për të vijuar në rrugën e pakthyeshme të reformave dhe plotësimit të të gjitha kushteve të domosdoshme për çeljen e negociatave për anëtarësim.

Vlerësuam se mundësitë e bashkëpunimit ekonomik janë ende të pashfrytëzuara aq sa duhet dhe se shkëmbimet tregtare, ekonomike dhe turistike janë ende larg mundësive të prekshme.

E falenderova Presidentin Ader për kënaqësinë e veçantë, që më dha, për të përuruar së bashku bustin e Heroit tonë Kombëtar, Gjergj Kastrioti Skënderbeu në Budapest, simbol të rifreskimit të bashkëpunimeve të ngushta mes dy vendeve dhe popujve tanë dhe së ardhmes së tyre premtuese.