Celibashi: KQZ çon për ndjekje penale 67 numërues. Vetëm në 2 qendra votimi, 20 raste me votim të shumëfishtë

Komisioneri Shtetëror i Zgjedhjeve, Ilirjan Celibashi, në një prononcim për mediat deklaroi se KQZ do të çojë për ndjekje penale në prokurori 67 anëtarë të grupeve të numërimit në zgjedhjet e 25 prillit.

Celibashi tha se vetëm në dy qendra votimi janë identifikuar 20 raste të votimeve të shumëfishta.

“Në total janë 67 anëtarë të grupeve të numërimit, emrat e të cilëve do të referohen në organin e prokurorisë. Të gjitha shkeljet që i kemi vlerësuar si shkelje penale, kanë të bëjnë me diferenca në fletët e votimit, apo në rezultatin e votimit për kandidatin, jo për partinë.
Ne s’kemi në kushte as për të hetuar dhe verifikuar për këta anëtarë, që janë apo jo përgjegjës për këtë parregullsi. Do t’i takojë organit të prokurorisë për të parë që nesër janë të 4 anëtarët e grupit përgjegjës, apo vetëm njëri prej tyre. Të 4 janë përgjegjës para ligjit. Janë 20 raste kur kemi parë votim të shumëfishtë. Janë në 2 qendra votimi këto raste”, tha Celibashi.