”Defender 21”, Basha: Kjo stërvitje është një mesazh për despotët e Ballkanit
Edhe pse jo i pranishëm në ceremoninë e nisjes së stërvitjen më të madhe të mbajtur ndonjë herë në Shqipëri me trupa nga SHBA dhe Europa, në një komunikim me gazetarët nga selia blu, Lulzim Basha, i uroi Forcave të Armatosura që të mbajnë lart krenarinë kombëtare. Kreu i selisë blu, tha se ky është mesazhi i qartë për këdo që ëndërron kthimin e Ballkanit në një fuçi baruti apo në një teatër lojërash territoriale.
”Dua të falënderoj të gjithë forcat e NATO-s dhe SHBA në një ushtrim historik “Defender Europe 2021”. Kam krenarinë e veçantë dhe privilegjin t’ju uroj mirëseardhjen këtij ushtrimi të paprecedentë të NATO-s që nga përfundimi i Luftës së Dytë Botërore dhe të shpreh krenarinë legjitime që PD, qeverisja jonë dhe unë si ministër i jashtëm mundësuam atë që dukej ëndërr e pamundur.
Ju uroj mirëseardhjen gjithë forcave aleate të kryesuara nga partneri ynë strategjik dhe i uroj Forcave të Armatosura të Shqipërisë që ta mbajnë lart standardin, flamurin dhe krenarinë e kombit tonë me këtë ushtrim që do ti tregojë të gjithë rivalëve potencialë të aleancës së Atlantikut të Veriut se aleanca është e gatshme të përballet me çdo agresion dhe ta zmbrapsë nëse vlerat janë të pacenueshme duke filluar nga liria, demokracia deri tek stabiliteti rajonal për respektimin e kufijve.
Le të jetë ky mesazh i qartë për këdo që ëndërron kthimin e Ballkanit në një fuçi baruti dhe një paralajmërim për despotët e Ballkanit se kjo nuk është aleancë politike por është aleancë politiko ushtarake”.
