Dekriminalizimi, KQZ vendos publikimin e zyrtarëve që kanë dorëzuar formularët

Komisioni Qendror i Zgjedhjeve vendosi sot evidentimin dhe publikimin e listës së funksionarëve publikë që e kanë depozituar dhe listës së atyre që nuk i kanë depozituar formularët e vetëdeklarimit, në zbatim të ligjit për dekriminalizimin.

KQZ, si organi kompetent për regjistrimin, administrimin dhe përpunimin e formularit të vetëdeklarimit për funksionarët publike, në përfundim të afatit ligjor, konstaton se këtë dokument e kanë dorëzuar pranë Komisionit Zgjedhor të 140 deputetët e Kuvendit; të 19 ministrat e qeverisë që nuk janë deputetë, të 61 kryetarët e bashkive, ndërsa sa i takon këshilltarëve, nga 1595 që e kanë detyrim, 1530 prej tyre e kanë dorëzuar, ndërsa mungojnë 65 formularë.

Nga verifikimi i kryer del se nga 65 këshilltarë që figurojnë pa dorëzuar formularët e vetëdeklarimit, 16 prej tyre kanë dhënë dorëheqjen ose kanë humbur mandatin para afatit të dorëzimit të formularit.

Ndërsa 49 këshilltarë që e kanë detyrim nuk e kanë depozituar formularin e vetëdeklarimit brenda afatit të përcaktuar.

Gjatë mbledhjes së sotme, kryetarja e KQZ-së, Lefterije Luzi, dha sqarime dhe për kërkesën e Prokurorisë së Përgjithshme për verifikimin e formularit të vetëdeklarimit të kryetarit të bashkisë Kavajë, Elvis Rroshi.

“Ne tani po e fillojmë këtë detyrë, – deklaroi ajo, – kemi kërkuar informacion, që mesa kemi dijeni do na vijë brenda pak ditësh, besojmë sot ose nesër”.