Denoncimi i Blushit/ Dule shpërthen ndaj Ramës: Po ndodh një krim, përse nuk reagon askush?!

Deputeti Vangjel Dule ka reaguar pas denoncimit të deputetit Ben Blushi i cili tha se është kërcënuar nga kryebashkiaku i Kavajës Elvis Roshi.

Dule tha se jemi duke u përballur me një krim dhe askush nuk reagon.

Sipas Dules, kjo është një situatë e rëndë dhe mbi të gjitha pasi askush nuk reagon për kërcënimin e deputetit të Kuvendit të Shqipërisë.

“Sot na plasi skandali më i madh në podiumin e Parlamentit. Një koleg deputet na njofton se është i kërcënuar. Përgjegjësia së pari është politike, së dyti është penale. Jemi dëshmitarë se po ndodh një krim. Çfarë shembulli po i japim elektoratit?

Këshillohuni me këshilltarët e rregullores. Ndoshta Kryeministri nuk e ndjen përgjegjsinë e tij politike. Nëse ka arritur situata politike që të dëgjojmë nga podiumi i Kuvendit se një koleg kërcënohet dhe askujt nuk i djersin veshi, cdo diskutim tjetër më kot që bëhet. Për çfarë dekriminalizimi, reforme në drejtësi po flasim”, tha Dule.