Deputetët e opozitës futen me forcë në zyrën e Nikollës

Deputetët e opozitës janë përplasur sërish me gardën, teksa kanë tentuar të hyjnë në zyrën e kryeparlamentares Lindita Nikolla në kryesinë e Kuvendit.

Në katin e dytë të Kuvendit, po zhvillohej dhe mbledhja e konferencës së kryetarëve për prezantimin e pr.buxhetit për vitin 2024, e pezulluar më herët, për një situatë të ngjashme.

Ministri i Ekonomisë Ervin Mete, bëri prezantimin e projektligjit për buxhetin 2014.

Teksa ishte parashikuar që të niste në orën 10:00, deputetët e opozitës, u përplasën me deputetët socialistë, duke mos i lejuar të zhvillojnë mbledhjen. Mbledhja u shty për në orën 13:00, por sërish në nisje të mbledhjes, deputetët e opozitës krijuan trazira dhe u përplasën me gardën.

Të pamundur për të kaluar këtë pengesë, deputetët opozitarë, Bardhi, Nika, Paloka, Salianji, Korreshi, Hoti, por edhe të tjerë, kanë hyrë me forcë në zyrën e kryetares Lindita Nikolla, ndonëse truproja e saj tentoi t’i ndalonte.