Deputetët rebelë, apo ”kukllat” e Bashës?

Nga: Redjon Shtylla

Lulzim Basha po del të jetë njeriu që firmos vendime të mëdha, por në dëm të PD-së, si nga marrëveshjet me Edi Ramën, djegia e mandateve parlamentare në 2019, apo dhe furtuna e fundit, përjashtimi përgjithmonë nga partia e figurave si Sali Berisha, Flamur Noka, Edmond Spaho, Albana Vokshi, Bujar Nishani, Arben Ristani, Grigels Muçollari, Keltis Kruja dhe Klevis Balliu. Në mbledhjen e Kryesisë, pezulloi edhe 19 anëtarë të tjerë të partisë, mes tyre disa deputetë si Tritan Shehun, Oerd Bylykbashin, Belind Këlliçin, Agron Shehajn etj.

Lulzim Basha dha provën e parë të rezistencës për të mos e lëshuar PD, por dhe Sali Berisha vijon të deklarojë se do ta vazhdojë revolucionin për t’ia kthyer seli demokratëve.

Partia Demokratike, e ngritur me idealet europiane por që ranë rrugës, pasi vetëm në Shqipëri politika nuk ka cipë dhe ideale, sot nuk dihet a është më një parti. Vendimi i Bashës për të përjashtuar nga partia deputetët rebelë, është shkëndija që ndez më shumë zjarrin që tashmë ka rrethur prej kohësh selinë blu. Sipas PD-së, dhuna e ushtruar rrezikoi seriozisht jetën e deputetëve, anëtarëve të kryesisë dhe përfaqësuesve të PD-së, që ndodheshin në katin e dytë të godinës.

Por problemi i madh i PD-së, nuk është lufta Basha-Berisha, por përjashtimet nga partia, si kurrë më parë. ”Lufta” që Basha u ka hapur deputetëve rebelë, që ishin ata që i sollën PD-së 59 mandate në zgjedhjet e 25 prillit, nuk mund të zëvëndësohen nga deputetë ”kuklla” që dramatizojnë dhe rreshtrohen krah Bashës, kur u duhet ti dalë përballë demokratëve dhe të çojnë partinë në zgjedhje. Ata duhet të qetësojnë situatën, e jo të shijojnë rehatin si deputetë, pasi janë votuar për të qenë opozitë e qeverisë, e që luftën me këtë të fundit e kanë harruar prej muajsh.

Është koha për mbledhje të partisë, jo të përjashtimeve pasi nuk e zgjidhin konfliktin, por e thellojnë më shumë dhe ndoshta mund të duhen vite që PD të mobilizohet e të bëhet gati për të fituar zgjedhjet, edhe pse është punë e vështirë kur përballë është Edi Rama, dhe Basha akuzohet si peng i tij. Nuk është koha që deputetët që populli demokrat aq që i njeh, të heshtin edhe më shumë. Ata tashmë kanë në dorë fatin e PD-së, e nëse ju dhemb partia dhe demokratët në mbarë Shqipërinë, duhet të mblidhen e të çojnë partinë në zgjedhje, sa më parë aq më proces i shkurtër do të jetë rregullimi i situatës.

Deputetët rebelë fitojnë kurdoherë, madje mund të dalin edhe më të fituar nga përjashtimet, por këto vendime vetëm sa ulin lidershipin Lulzim Basha.