Deputeti gjerman: Do të punojmë fort që javën e ardhshme Shqipëria të nisë negociatat me BE

Lajme të mira ka nga Gjermania për çështjen e integrimit të Shqipërisë në Bashkimin Europian. Këtë të mërkurë, kreu i grupit parlamentar i Partisë Socialiste, Taulant Balla mbajti një konferencë për shtyp me deputetin e Bundestagut gjerman, Adis Ahmetoviç. Deputeti shprehu keqardhjen se BE-ja kishte shansin tre javë më parë që t’i liberalizonte vizat Kosovës, si edhe t’i jepte një shtysë procesit integrues të Shqipërisë dhe RMV-së.

Ndër të tjera ai nënvizoi se qeveria e re e Olaf Scholz, do të punojë fort që vendi ynë të nisë negociatat me BE-në javën e ardhshme. Po ashtu Ahmetoviç shprehu angazhimin e tij për këtë proçes.

“Ne si qeveri e re e shohim Shqipërinë, si anëtar të BE-së. Para 3 javësh patëm një konferencë, duhet ta them që jam edhe vetë kritik. Kishim një shans historik t’i jepnim Kosovës liberalizimin e vizave dhe të ndihmonim Shqipërinë e RMV në rrugën e integrimit. Do punojmë që javën e ardhshme që Shqipëria të nisë negociatat. Keni edhe mbështetjen time personale për integrimin dhe anëtarësimin e Shqipërisë në BE. Për të përfaqësuar kompromisin e BE për të gjetur një zgjidhje për Shqipërinë dhe RMV”.