Dhunimi i Kryeredaktorit të ”KJ”, ish-deputetja Vokshi: Po filmonte dhunën barbare që Rama kishte urdhëruar

Ish-deputetja e PD-së, Albana Vokshi ka reaguar për shoqërimin dhe dhunimin që Policia e Shtetit bëri me kryeredaktorin e ”Koha Jonë”, Qamil Xhani mbrëmjen e kësaj të premte në ambientet e redaksisë. Vokshi ka denoncuar dhunën e ushtruar, ku edhe thotë se ”Sonte një tjetër gazetar u mor me forcë nga policia. Kryeredaktori i gazetës ”Koha Jonë”, Qamil Xhani, një gazetar i talentuar dhe shumë qytetar, u arrestua brutalisht nga policia poshtë redaksisë. Gazetari po filmonte dhunën barbare që Kryeministri kishte urdhëruar të ushtrohej mbi fëmijët dhe të rinjtë protestues”,-shkruan Vokshi në facebook.

Postimi i plotë

Edi Rama hoqi maskën dhe nxori fytyrën e diktatorit duke nxitur policinë të dhunojë egërsisht protestuesit dhe gazetarët. Arreston protestuesit që të mbajë pushtetin me dhunë, arreston gazetarët për të fshehur dhunën barbare të policisë mbi fëmijë e të rinj.

Sonte një tjetër gazetar u mor me forcë nga policia. Kryeredaktori i gazetës ”Koha Jonë”, Qamil Xhani, një gazetar i talentuar dhe shumë qytetar, u arrestua brutalisht nga policia poshtë redaksisë. Gazetari po filmonte dhunën barbare që Kryeministri kishte urdhëruar të ushtrohej mbi fëmijët dhe të rinjtë protestues.

Edi Rama sot e hoqi maksën e tregoi se ishte ai që nga New Yorku dirigjonte dhunën policore mbi protestuesit, dje dhe sot nga zyra e tij në Tiranë, ku shkon me eskortë nga frika se i ka ditët e numëruara. Në 7 vjet, Edi Rama ndërtoi shtetin policor kundër qytetarëve dhe tani që i ka ardhur fundi, po arreston të rinj, gazetarë, opozitarë. Boll më!  Lirinë nuk ia falim Edi Ramës!