Do përsëritet në PD historia e ”6 marsit”? Kandidat të përbashkët në garën lokale

2023 afron shpejt, bashkë me të edhe data për zgjedhjet lokale. Por 6 marsi i zgjedhjeve të pjesshme vendore nuk ishte një moment krenarie për demokratët. Për të shmangur historinë që tregoi produktin e çarjes së tyre të fortë, prej të dy palëve kanë nisur sinjalet e para për kandidat të përbashkët në garën për bashkitë në 2023-shin.

Nënkryetari i PD-së Luçiano Boçi, thotë se përtej mesazheve, përmes medias çdo deputet duhet të zgjedhë bazën demokrate, përtej qëndrimeve personale. Nga kampi i ”Alibeajt”, deputetja Dhurata Çupi tregon se dalja me 1 kandidaturë të vetme kërkon një mekanizëm serioz funksionimi dhe jo direktiva nga njëra palë.

Brenda pak javësh pritet që Presidenti Bajram Begaj të dekretojë datën e zgjedhjeve vendore të 2023. PD-ja e Berishës pret që kreu i shtetit të njohë realitetin politik dhe të bëhet pjesë e konsultimit që bën me partitë politike në këtë rast.