Dritan Hila: SPAK të hetojë edhe lidhjen e Ahmetajt me biznesmenë e politikanë të tjerë

SPAK i është drejtuar ditën e Kuvendit me kërkesën për arrestimin e Arben Ametajt. Gazetari Dritan Hila thotë se pas aferës së inceneratorit, fshihen edhe biznesmenë të tjerë të përfshirë në dhënien e parave ndaj Ahmetajt, për të cilët SPAK duhet të hetojë po ashtu.

“Kjo është një aferë që nuk mund të kalonte vetëm me Mërtirin dhe Zoton. Rama i ka besuar verbërisht Ahmetajt, sepse është i aftë në fjalë. Ka qenë një projekt që kryeministri ka dashur të bëhen inceneratorë, por që Ahmetaj ka ngecur brenda, që të lesh gjurmë të tilla…Ahmetaj është një ujk i vjetër që e njeh shtetin.

Edhe kur ishte në ministri të tjera e komandonte ministrinë e Financave, përmes njerëzve të tij. Siç është i përfshirë me këta dy biznesmenë, është i përfshirë edhe me biznesmenë të tjerë. Dhe i duhet shkuar deri në fund. Qoftë për politikanë, qoftë dhe për biznesmenët. Nëse ka vjedhur dhe Rama, të shkojë dhe Rama në burg. Kush janë bashkëpunëtorët e tyre? Se nuk janë të vetmit fajtorë ata! Ne duhet t’i kërkojmë llogari. Sot ekonominë shqiptare nuk po e ‘rrjepin’ politikanët vetëm, por edhe biznesmenët. Këta shkatërrojnë konkurrencën e pastër. Ka qenë 8 vite ky zotëria ministër.

Nuk iu ka bërë favore vetëm këtyre të dyve, por me dhjetëra biznesmenëve. Ky është mirë që të ‘krihet’ në të gjitha drejtimet. Berlusconi vdiq i ndjeri, por e persekutuan deri në momentin e fundit. Mos t’ju duket çudi që biznesmenët t’i hyjnë politikës”, tha ai.