”Duhet të ringremë PD”, Alibeaj në Korçë: Çdo votë për Berisha-Metën na çon në të shkuarën

Kryetari i komanduar i PD-së, Enkelejd Alibeaj e ka ”harruar” 14 Majin, pasi thotë se ka për qëllim që të ringrejë këtë forcë politike, përtej të gjitha vështirësive që ka kaluar. Për rrjedhojë, nga Korça ku u ndal në takimin e radhës, Alibeaj tha se çdo votë për PD është për të ardhmen e saj, e ndërsa thekson se vota për Sali Berishën dhe Ilir Metën e çon në të shkuarën.

“Demokratët e Korçës e kanë të qartë se në 14 maj, e vetmja alternativë e djathtë është Partia Demokratike. Prandaj nga Korça i bëmë thirrje demokratëve korçarë dhe gjithë Shqipërisë, për të votuar masivisht numrin 9, Partinë Demokratike të Shqipërisë.

Me gjithë vështirësitë që ka kaluar Partia Demokratike në vitin e fundit, ne jemi të vendosur për ta ringritur atë më të fortë se më parë. Për këtë qëllim lipset kontributi i gjithë secilit që kërkon një parti më demokratike, më parimore dhe më të drejtë. I falënderoj demokratët e Korçës, të cilët nuk heqin dorë asnjëherë nga bindjet dhe nga vlerat e tyre. Me demokratë të tillë, e ardhmja e kësaj partie është e sigurt.

Pengesat nuk na stepin aspak. Përkundrazi, na bëjnë më të fortë për të vazhduar në rrugën tonë të përbashkët. Rruga jonë e përbashkët ka vetëm një qëllim: Krijimin e një të djathte moderne dhe eurotalantike. Një e djathtë e cila i shërben interesit të qytetareve dhe të Shqipërisë. Jam besimplotë se do t’a dalim falë kontributit të gjithë secilit prej jush”, tha Alibeaj.