Duka: Jam në politikë falë qytetarëve dhe jo kryetarëve të partive

Kandidati për bashkinë e Durrësit Agron Duka ka reaguar në facebook për mos kandidimin e tij nga Partia Demokratike. Ai thotë se janë kulisat ata që kanë ndikim tek kryetarët e partive për interes e tyre duke rënë në kundërshtim me interesin qytetar.

Duka thotë se në politikë nuk ka mbijetuar për shkak të kryetarëve të partive, por vetëm nëpërmjet mbështetjes së qytetarëve.

“Me ndarjen e re territoriale të vendit në zgjedhjet e ardhshme vendore, faktori më i rëndësishëm zgjedhor nuk janë kulisat që bëhen prapa perdeve të kryetarëve të partive, por aleanca me qytetarët. Nga njera anë drejtuesit e PD-së trumbetojnë me të madhe formulën e aleancës me qytetarët dhe nga ana tjetër japin zgjidhje kulisash, në kundërshtim me interesin dhe vullnetin politik të qytetarëve. Unë në zgjedhjet e ardhshme vendore do të marr vendim dhe do të veproj në aleancë, interes dhe me vullnetin e qytetarëve të Durrësit. Historia ime politike ka dëshmuar se po të ishte për kryetarët e partive apo kryeministrat s'do isha kurrë në politikë. Kanë qenë qytetarët dhe vota e tyre të cilët më kanë futur në politikë dhe ata të vetmit të cilëve i kam shërbyer pa ngurrim. Kështu do të jetë edhe në të ardhmen”, shkruan Agron Duka në facebook.