Duma: Ulje taksash për biznesin e vogël

Kandidatja e PD-së për kryetar bashkie në Durrës, Grida Duma gjatë një bashkëbisedimi me përfaqësues të biznesit të vogël mbi modelin e ri ekonomik të qytetit, premtoi uljen në minimum të taksave vendore, uljen e taksës së pasurisë dhe fillimin e një marrëdhënie të re për hapjen e vendeve të reja të punës.

Kandidatja Duma shprehu nevojën për një bashkëpunim të ri mes bashkisë dhe sipërmarrjes private për të shtuar vendet e punës. Përfaqësuesit e biznesit, nga ana e tyre, thanë se ndodhen në kufijtë e mbijetesës dhe kërkuan mbështetje dhe ulje taksash. “Ne jemi i vetmi qytet që kemi taksën e pasurisë 400 lekë për m2. Po t’i shtosh kësaj rritjen e taksave të tjera në nivel kombëtar si tatim fitimi apo presione të tjera nga qeverisja qendrore, situata për bizneset rëndohet”, u shpreh një nga përfaqësuesit e biznesit të vogël.

Kandidatja e djathtë u shpreh se bashkëpunimi me biznesin do të jetë prioritet, duke pasur synim hapjen e vendeve të punës. Ajo propozoi edhe ngritjen e Senatit të Durrësit, një këshill konsultativ ku do të marrin pjesë të gjitha grupet e interesit e do të jenë pjesë e vendimarrjes për çdo vendim të rëndësishëm në qytet.