Edhe PD në Kongresin e PBDNJ: Kemi vlera të përbashkëta

Kryetari i grupit parlamentar të Partisë Demokratike, Edi Paloka, ka marrë pjesë sot në Kongresin e PBDNJ, duke sjellë përshëndetjet e kryetarit të PD-së, Lulzim Basha.

Në fjalën e tij, Paloka tha se “Në rrugën politike të këtyre viteve të demokracisë, Partia Demokratike dhe PBDNJ kanë ndarë shpesh vlera të përbashkëta, ato më themeloret si, respektimi i vlerave të njeriut, për pronën për standartet e demokracisë. Po ashtu, kemi ndarë edhe shqetësimet e përbashkëta kur këto parime janë cënuar nga qeveritë”.

“Sot duhet ta themi se vendi dhe qytetarët janë si asnjëherë tjetër të rrezikuar, të kanosur, në dinjitetin e tyre edhe të ekzistencës, të parimeve dhe vlerat e demokracisë nga paligjshmëria dhe arbitrariteti. Mijëra qytetarë kanë humbur pronat e tyre pa pralajmërim në kundërshtim me procedurat e tyre, mijera qytetarë dhunohen çdo ditë nga korrupsioni dhe sundimi i të fortëve, që shpesh rezultojne te lidhur me qeverinë”, tha Paloka.

Në vijim të fjalës së tij, ai theksoi gjithashtu se “çdo parti politike duhet të jetë e kujdesshme, pasi është momenti kur duhet të ruajme vendin nga kapja e drejtësisë. Sot kemi shansin dhe detyrimin të jemi bashkë për hir të vendit dhe të fëmijëve tanë”.