Edi Rama lë jashtë axhendës me John Kerry kryeparlamentarin Meta

Sekretari Kerry do të mbërrijë në Tiranë, ditën e Shën Valentinit në orën 9.00. Ai do të ketë një takim në Rinas me Presidentin e Republikës, Bujar Nishani. Më pas Sekretari Amerikan i Shtetit do të pritet në kryeministri nga kryeministri Edi Rama dhe Ministri i Jashtëm Ditmir Bushati. Më pas axhenda e Sekretarit Kerry do të vazhdojë edhe me një takim në Hotel Rogner me kryetarin e Partisë Demokratike, Lulzim Basha. Ndërkohë që në axhendën e Kerryt do të ketë vend edhe për një takim me zv/kryeministrin e Kosovës Hashim Thaçi. Ajo që bie në sy është fakti që John Kerry nuk ka në axhendën e tij një takim me kryetarin e Kuvendit Ilir Meta. Dhe kjo do të jetë hera e parë që një Sekretar Amerikan Shteti i cili viziton Shqipërinë, nuk takohet me kryetarin e Kuvendit të Shqipërisë.

Po kësaj radhe kush e përjashtoi Ilir Metën nga axhenda e takimeve të zyrtarit të lartë amerikan? Përsëri Tom Doshi me Dritan Priftin? Tashmë Edi Rama nuk mund të ketë asnjë alibi përpara aleatit të tij Ilir Meta. Izolimi i Ilir Metës ka vetëm një shkaktar. Ai është Edi Rama. Ndërsa ish-kryeministri Berisha ka preferuar të qëndrojë jashtë delegacionit të PD-së që do të takohet me Sekretarin Kerry, duke respektuar mospërfshirjen e tij në asnjë funksion drejtues në PD, Ilir Meta do të ishte i gatshëm të ishte në delegacionin e kreut të qeverisë sa për të hequr çdo dyshim se ka një izolim perëndimor ndaj tij. Por as këtë nuk ka bërë Edi Rama, aleati që 6 ditë të javës punon si ta eliminojë politikishtë, dhe çdo të mërkurë i përbetohet se po e sulmon Toma me Priftin për inatet e vjetra.

A mund të besohet se edhe jashtë axhendës së Sekretarit Kerry e ka lënë Toma me Priftin? Kësaj radhe nuk ka më asnjë alibi.(syri.net)