Edi Rama sjell atmosferën e festave të fundvitit në Sarandën magjike

Përmes një videoje të ndarë në rrjetet sociale, kryeministri Edi Rama ka sjellë një portret mahnitës të qytetit bregdetar të Sarandës, të cilin ai e ka quajtur “Saranda magjike”. Videoja paraqet qytetin të mbushur me gjallëri, atmosferën e festave dhe një dekor të ndritur që i përshtatet shpirtit të kremteve dimërore.

Duke sfiduar të ftohtin dhe duke përfituar nga rrezet e ngrohta të diellit të fillimdimrit, Saranda shfaqet si një destinacion që reflekton gëzim e bukuri në çdo stinë. Pamjet e përjetësuara në këtë video pasqyrojnë energjinë e pashtershme të qytetit, që gjen arsye për të festuar dhe për të shfaqur hijeshinë e vet unike.

Saranda, me bregdetin e saj të kristaltë dhe kulturën mikpritëse, dëshmon se magjia e saj nuk është e kufizuar vetëm në verë, por mbetet një thesar që sfidon kohën dhe stinët, duke tërhequr vizitorë në çdo moment të vitit.

Albert Vataj