Erdogan flet në Kuvendin e Shqipërisë: Largoni FETO-n, rrezikoni të njëjtën gjë si Turqia

Pas konferencës së përbashkët me kryeministrin Edi Rama, Presidenti i Turqisë Rexhep Tajip Erdogan, mbajti fjalën përshëndetëse në Kuvendin e Shqipërisë. Më së shumti rëndësi i dha organizatës FETO, të cilën Presidenti turk e quan terroriste, ndaj edhe i bëri thirrje Shqipërisë që të marrë masa.

Sipas Erdoganit, shumë pjesëtarë të FETO-s fshihen në Shqipëri dhe kjo në institucione të ndryshme dhe kanë agjendë të fshehtë. Për të nëse nuk merren masa të menjëhershme, ata mund të organizojnë në vendin tonë një grusht shteti ashtu si në Turqi.

“Lufta kundër organizatës terroriste Feto, e cila tentoi një grusht shteti në vendin tonë, sulmoi demokracinë, bombardoi parlamentin, është një nga ndjeshmëritë tona. Shumë anëtarë të kësaj organizate vazhdojnë të jenë në Shqipëri dhe tregojnë ekzistencën e tyre në arsim, shëndetësi dhe institucionet fetare dhe në një pjesë të sektorit privat. Një mik i vërtetë është ai që nuk heziton të thotë të vërtetën edhe nëse është e hidhur.

Ashtu si në Turqi edhe këtu institucionet e lidhura me FETO kanë agjenda të fshehura, prandaj nuk duhet të keni dyshim se ata me të ardhur koha do të zbulojnë fytyrën e vërtetë. Sa më shpejt të shpëtoni nga kjo strukturë helmuese që përbën kërcënim për sigurinë kombëtare.

Nëse nuk reagoni në kohë është e pashmangshme që tentativat që kjo strukturë realizoi në Turqi të përsëriten në Shqipëri. Ne e kemi parë dhe kemi paguar një kosto të rëndë. Ne e shohim si detyrë që të paralajmërojmë miqtë tanë. Presim që Shqipëria të marrë masa ndaj FETO dhe të mos lejojë që marrëdhëniet tona të errësohen”.