Eriselda Sefa zgjidhet në krye të bashkisë së Lushnjës

Eriselda Sefa do të jetë kryetarja e re e Bashkisë Lushnje, pas votimit të 34 anëtarëve të pranishëm, me 29 vota pro, 4 vota kundër dhe 1 abstenim.

Kjo situatë e jashtëzakonshme vjen pas shkarkimit nga detyra të Fatos Tushes, i cili u arrestua nga SPAK për abuzimin me tenderin 240 milionë lekësh të kanalit vaditës të sy fshatrave.

Sipas ligjit 139 të vitit 2015 për qeverisjen vendore i takon njërit prej nënkryetarëve të bashkisë të marrë postin e kryebashkiakut.

Aktualisht bashkia Lushnje ka dy nënkryetarë, Gentian Nushin dhe Eriselda Sefan.

Pas fillimit të mbledhjes Gentian Nushi njoftoi tërheqjen nga gara pasi sipas tij duke pasur pozicionin e kryetarit të Partisë Socialiste nuk mund ta kryejë funksionin e kryetarit të bashkisë Lushnje.

Pas tërheqjes së Nushit këshilli vendosi që të kryhet votim i fshehtë për nënkryetaren Eriselda Sefa me tre opsione pro kundër dhe abstenim.