Eurodeputetët mesazh Ballkanit: Mos ndalni ritmin e reformave për integrimin në BE

Mos ndalni ritmin e reformave të integrimit europian. Ky është mesazhi që eurodeputetët e komisionit të punëve të jashtme të Parlamentit Europian u kanë përcjellur kryetarëve të parlamenteve të Ballkanit në Bruksel. Eurodeputetët ndajnë të njëjtin zhgënjim për mosmarrjen e vendimit nga Këshilli Europian për hapjen e negociatave të anëtarësimit me Shqipërinë dhe Maqedoninë e Veriut në tetor të 2019. Por për ta, zgjidhja për të bindur shtete anëtare skeptike që bllokuan marrjen e një vendimi pozitiv qëndron te progresi në reforma. Raportuesja për Shqipërinë në Parlamentin Europian, Isabel Santos ka theksuar, se nuk duhet dobësuar procesi i reformave.

“Shpresojmë që situata e samitit europian të tetorit të mos riprodhohet dhe që vendet e Ballkanit të vazhdojnë reformat jo vetëm se prej tyre varet anëtarësimi në Bashkimin Europian, por sepse ato janë të rëndësishme për standartet e jetesës për qytetarët tuaj. Nuk duhet të dobësoni procesin e reformave. Ju duhet të vazhdoni me të njëjtin ritëm dhe ne do t’ju mbështesim deri në fund. Proçesi i zgjerimit aktual mbart shumë burokraci.  Duhet të  rishikojmë procesin dhe proçedurat. Por kjo nuk duhet t’ju pengojë për ruajtjen e ritmit të e shpejtë të reformave”, tha Isabel Santos, raportuese për Shqipërinë në PE:

“Që prej 2014, ku Shqipëria ka marrë statusin e kandidatit, Shqipëria ka bërë progres deçiziv lidhur me përmbushjen e pesë prioriteteve të përcaktuara pêr hapjen e negociatave. Nga ana tjetër, qeveria shqiptare duhet të trajtojë më tej problemet aktuale”, u shpreh Manolis Kefalogiannis, kryeatar i delegacionit PE-Shqipëri.

“Që të kemi një rajon të qëndrueshëm, duhet të forconi reformat e brendshme, siç e përmendi dhe Isabel për të bërë të mundur zbatimin e reformave që ju kërkojnë qytetarët tuaj. Për shembull, krijimin e një qeverie të re, apo përmirësimin e cilësisë së arsimit, shëndetësisë dhe punësimit. Kêshtu ne mund të përftojmë përshtypjen, që nuk bëhet fjalë vetëm për një presion të jashtêm pêr reforma, por është vetë ambicia juaj e brendshme për të kryer reforma. Ne ofrojmë asistencên financiare dhe kuadrin e duhur dhe ju zbatoni reformat e nevojshme”, tha Viola Von Cramon Taubadel, raportuese për Kosovën në PE:

“Eshtë njê qasje e re dhe një zhvillim i ri që ne vendeve të Ballkanit Perëndimor na jep shpresë dhe besim edhe me gjithë dekurajimin që ne patëm nga vendimi i vitit të kaluar lidhur me moshapjen e negociatave. Kêtu nuk bëhet fjalë vetëm për Shqipërinë dhe Maqedoninë e Veriut, por për të 6 vendet, pasi ne  ndjekim shumë ecurinë e njëri tjetrit, që na shërben duke qenë se jemi 6 vende me shpejtësi të ndryshme”,  Gramoz Ruçi, kryetar i Kuvendit të Shqipërisë”, tha Glauk Konjufca, kryetar i Kuvendit të Kosovës:

“ Kuvendet kanë përgjegjësinë e mbikëqyrjes së qeverive që marrin përsipër zbatimin e reformave të integrimit.Me fjalë të tjera, nuk mund të kemi qeveri reformuese, nëse nuk do të kemi Kuvende të tilla”, u shpreh Talal Xhaferri, kryetar i Kuvendit të Maqedonisë së Veriut:

“Vendimi zhgënjyes i tetorit të shkuar është shfrytëzuar nga politikanët, por ne kemi vendosur që të  zhvillojmë zgjedhje të parakohshme në 12 prill dhe jemi të bindur se qytetarët do të na japin sërish besimin e tyre për thellimin e procesit të integrimit europian. Nuk ka asnjë arsye përse zgjedhjet të mos shkojnë siç duhet”.

Kryetarët e parlamenteve të Ballkanit vlerësuan samitin e parë të këtij lloji në Parlamentin Europian me presidentin e Parlamentit Europian, kryetarët e grupimeve politike  dhe eurodeputetët e komisionit të punëve të jashtme si një hap të ri të forcimit tê marrëdhënieve ndërparlamentare BE-Ballkan.

/abcnews.al