Festa e fejesës kthehet në tragjedi, 4 të rinj humbin jetën në mesnatë në aksin Fushëkrujë-Milot

Kthimi nga fejesë është kthyer në tragjedi. 4 viktima ka regjistruar një aksident i ndodhur pak pas mesnatës në aksin rrugor Fushë Krujë-Milot. Alfred Dika, 39 vjeç, Artan Alushi, 30 vjeç, Shkumbin Brati, 20 vjeç, dhe Almenia Karaj,16 vjeçe kanë humbur jetën.

Aksidenti ka ndodhur në afërsi të fshatit Borizanë në Fushë-Krujë, ndërsa shkak dyshohet shpejtësia e madhe, lagështira në rrugë si dhe parakalimi i gabuar.

“Rreth orës 00:15, në aksin rrugor Fushë Krujë-Milot, një automjet me drejtues shtetasin A. D., 39 vjeç, është përplasur me automjetin me drejtues shtetasin A. A., 30 vjeç. Si pasojë e përplasjes kanë ndërruar jetë të dy drejtuesit e mjeteve dhe dy pasagjerët, shtetasit Sh. B., 20 vjeç, dhe A. K.,16 vjeçe, që ndodheshin në automjetin që drejtonte shtetasi A. A”, njofton Policia.

Nga përplasja ka mbetur e plagosur edhe një pasagjere 34 –vjeçare me iniciale R.H., e cila ndodhet në spital nën kujdesin e mjekëve, jashtë rrezikut për jetën.