Festa e Shën Joan Vladimirit në Elbasan, Presidenti Meta ndez qiri për mbarësi: Fali Zot ata që nuk dinë ç’bëjnë!

Këtë të premte dhjetëra besimtarë janë mbledhur në fshatin Shijon të Elbasanit për të kremtuar 4 qershorin që përkon me Festën e Shën Joan Vladimirit. Në mesin e qytetarëve ishte Presidenti i Shqipërisë, Ilir Meta i cili ndezi dhe një qiri për të uruar “Mbarësi”.

Shën Joan Vladimiri ishte një prijës dhe më vonë shenjtor, që nderohet çdo 4 Qershor (22 Maj sipas kalendarit të vjetër Julian) në Shijon të Elbasanit, nga e gjithë Kisha Orthodhokse në botë dhe veçanërisht në zonën e Ballkanit.

Në mënyrë të veçantë ai nderohet në fshatin Krajë të Malit të Zi, afër Shkodrës, ku është edhe vendlindja e shenjtorit dhe në fshatin Shijon afër Elbasanit, ku u varros trupi i tij dhe më vonë aty u ndërtua Manastiri i Hirshëm i Shën Joan Vladimirit.

Pas vizitës Presidenti Meta u pyet nga gazetarët për nismën e Kuvendit dhe theksoi se nuk ka asnjë shqetësim për shkarkimin nga një Parlament antikushtetues dhe pa kredibilitet.

Ai tha se duhet të merremi me hetimin zgjedhor dhe krimin e blerjes së votave. Më tej Presidenti Meta me ironi tha se “Fali Zot ata që nuk dinë ç’bëjnë!”, mesazh që ishte me shumë drejtime si ngacmim.

Gazetarja: Mos është lutje, për shkarkimin që kemi pas 5 ditësh në Kuvend?

Nuk ekziston asnjë lutje e tillë, lutja është që zoti ti falë ata që nuk dinë se çfarë mbrojnë, ti udhëheqë të gjithë drejt rrugës së mirë e të përbashkët. Është një përgjigje shumë e qartë. Kam ardhur këtu për t’iu bashkuar mesazhit të bashkëjetesës, të gjithë besimeve të ndryshme, besoj se kjo do të jetë shumë e qartë.

Gazetarja: Si bindeni që do jeni president deri në 2022 kur maxhoranca i ka votat për t’ju shkarkuar?

Tani nuk dëshiroj të flas në një vend të shenjtë për çështje që nuk ekziston. Kjo tema e shkarkimit, është më tepër pas 25 prillit, aq më tepër kur është konfirmuar çdo gjë që Presidenti ka thënë. Dhe kur u tregua qartë që Kuvendi i dy viteve të fundit është pa opozitë. Unë nuk kam asnjë shqetësim të tillë, nëse doni diçka serioze merruni me krimet zgjedhore.

Çfarë do të ndodhë në 9 qershor?

Në atë datë, do të zhvillohet seanca për shkarkimin e presidentit Meta. Deri më tani socialistët janë shprehur të vendosur pro shkarkimit, me pretendimin se kreu i shtetit ka bërë shkelje të rënda të Kushtetutës.