Festat në Berat e Korçë/ Policia Rrugore shton kontrollet: Të pranishëm në çdo aks (VIDEO)

Nisur nga festat që do të ndahen përgjatë fundjavës në Berat dhe në Korçë, Policia Rrugore ka ndërmarrë një sërë masash për mbarëvajtjen e qarkullimit në rrugët e vendit, duke shtuar dhe fluksin e fundjavës, si për Festën e Birrës në Korçë ashtu dhe për pelegrinazhin në malin e Tomorrit.

Shefi i Sigurisë Rrugore në Drejtorinë e Policisë Rrugore, Skënder Ismaili tha se Policia Rrugore ka marrë detyrimet e saj për javën, të përcaktuara në këtë plan masash dhe ka filluar zbatimin e tyre në terren.

Po ashtu Ismaili ka një mesazh për të gjithë drejtuesit e mjeteve, që të mos qarkullojnë me shpejtësi që cënon sigurinë e jetës në rrugë pasi do përballen në çdo rrugë me radarët e Policisë, të mos drejtojnë mjetin nën efektin e alkoolit apo në gjendje të dehur.

”Me ndryshimet e fundit të Kodit Rrugor nuk lejohet në asnjë masë përdorimi i alkoolit por duke filluar nga 0.01 mg/l fillojnë penalitetet të cilat vijojnë sipas masës së konsumimit të alkoolit, deri në pezullim te lejes së drejtimit dhe me arrest, kur drejton mjetin në gjëndje të dehur”.